سەرۆکی دەستەی باڵای بنکەی لالش داوا لەحزب و لایەنە سیاسییەکان دەکات لەیاسای نوێی هەڵبژاردنی پەرلەمانی کوردستاندا، کورسی کۆتا بۆ ئێزیدییەکان تەرخانبکرێت.
ئاوێنه: ئەو داواکارییە لەکۆنگرەیەکی رۆژنامەوانیدا هات کە ئەمڕۆ شەممە لەبارەگای بنکەی لالش لەدهۆک بەڕێوەچو.
سەعید جردۆ، سەرۆکی دەستەی باڵای بنکەی لالش ڕایگه‌یاند، "ئێزدی پێکهاتەیەکی سەرەکی و رەسەنن، بونی ئەوان لەدامەزراوەیەکی نیشتیمانی وەکو پەرلەمان گرنگەو نابێتە خاڵێکی لاواز بۆ ئەو دامەزراوەیە، بەڵکو سەرفرازییە بۆ هەموو لایەک و ناوبانگی سیاسی کوردستان لە دەرەوە جوانتر دەکات". هەربۆیە داوای لە لایەنە سیاسییەکان کرد، پاڵپشتی ئەو داواکارییەیان بکەن.
بنکەی لالش بۆ راگەیاندن و رۆشنبیری بەگەورەترین دامەزراوەی رۆشنبیری ئێزیدی دادەنرێت، لەساڵی 1993وە دامەزراوە، 38 بەش و نوسینگەی لەناوخۆی عیراق و دەرەوەدا هەیە.