وەزارەتی دەرەوەی سوریا بەتوندی ئیدانەی پلانی توركیا بۆ هێرشكردنە سەر باكوری ئەو وڵاتە دەكات و بەرپرسیارێتی ئەوەشی رودەدات دەخاتە ئەستۆی كوردانی سوریا بەهۆی ئەوەی "خۆیان خستۆتە نێو گرەوی پڕۆژەی ئەمریكاوە."
ئاوێنە: وەزارەتی دەرەوەی سوریا، ئەمڕۆ چوارشەممە، لەبەیاننامەیەكدا رایگەیاند دیمەشق بەتوندی ئیدانەی "لێدوانە بێباكانەو نیازە شەڕانگێزەكانی رژێمی توركیاو كۆكردنەوەی سەرباز لەسەر سنوری سوریا دەكات كە پێشێلكردنی ئاشكرای یاسا نێودەوڵەتییەكان و بڕیارەكانی ئەنجومەنی ئاسایشی نێودەوڵەتین كە سەرجەمیان جەخت لە رێزگرتن لە یەكپارچەیی و سەروەریی سوریا دەكەنەوە."
بەیاننامەكە ئەوەشی خستۆتەڕو"رەفتارە شەڕانگێزەكانی رژێمەكەی ئەردۆغان بەڕونی دەرخەری چاوچنۆكییە فراوانخوازەكەی توركیایە لەسەر خاكی سوریاو ناكرێت لەژێر هیچ بیانویەكدا پاساوی بۆ بهێنرێتەوە."
وەزارەتی دەرەوەی سوریا "هەندێك لە پارتە كوردییەكان"ی سوریای تۆمەتبار كردوە بەوەی "بەرپرسن لەهەر شتێك كە رودەدات لەئاكامی ئەوەی خۆیان خستۆتە نێو گرەوی پڕۆژەی ئەمریكاوە"و وتوشیەتی"پێشتر ئەو پارتانە لەمیانی دیدارەكانماندا لەگەڵیان چەندین جار ئاگاداركراونەتەوە لە مەترسییەكانی پڕۆژەی ئەمریكا، بەڵام ئەوان بونە داردەستی خزمەتكردن بە سیاسەتی ئەمریكا دژ بە نیشتمانەكەیان."