مافی مردن بەردەستە
دلاوەر عەلی سۆفی کەریم
2021-08-22 516
دوای ئەوەی حکومەتی هەرێمی کوردستان بڕیاری بەتایبەت کردنی زۆرێک لە
کەرتەکانی دا ، پێویستبو هەڵسەنگاندنیش بەدوایدا بێت تا سودو زیانەکانی دیاری
بکرێت بزانرێت سودەکانی بۆ سەرجەم هاوڵاتیان چیە نەک بۆ کۆمپانیاکان ، لەبەر ئەوەی
ئاشکرایە کە سودی بۆ کۆمپانیاو کەرتی تایبەت لە سەدا هەزارە و زەرمەندی گەورەو
یەکەم هاوڵاتی سادەیە ، ئێمە لێرەدا ئەمانەوێت لە کەرتی تەندروستی بدویین کە
ڕاستەوخۆ کاریگەری بۆ سەر خەڵکی سادە هەیە ، هەر بۆیە دوای لێدوان چەند پرسیارێکی
سادە ئەخەینە بەردەم دەسەڵاتو حکومەت ، دوابەدوای بڵاوبونەوەی پەتای کۆرۆنا زۆر
قەڵبەو کەلەبەری تر لە کەرتی تەندروستی کەوتنە بەر ڕوناکیو دەرکەوتن، لەوانە پەککەوتن
یان پەکخستنی کەرتی تەندروستی گشتی ( نەخۆشخانە حکومیەکان ) ، وە برەودان بە
نەخۆشخانەی تایبەت ، ئەگەر بەنمونە باسی نەخۆشخانەی شار بکەین لە سلێمانی ، ئەوکاتەی
ئەو نەخۆشخانەیە لە ساڵی ٢٠١٣ کرایەوە ئەتوانرا کە بە یەکێک لە نەخۆشخانە مودیرنو
پیشکەوتوەکانی دنیا دابنرێ ، بە پێوانەی ئەو ڕۆژگارە باشتیرینو پێشکەوتو ترین
ئامێرو دەزگای پزیشکی بۆ هاوردە کرابو ، بەڵام ئەگەر ئێستا بەدواداچونی بۆ بکرێت
ئەتوانین بڵێن وەک لە کار کەوتو وایە ، دەستنیشان کردنی هۆکارەکانی ڕەنگە ئاسان
بێت . ١ ــ لەوانە نەبونی لێپرسینەوەو سزادانی کەم تەرخەمان . ٢ــ بواردان بە
پزیشاکانو کارمەندانی کەرتی گشتی کەلە کەرتی تایبەتدا کار بکەن وەک دوو هەلی کار
.٣ــ ڕێگەدان بە ڕێکلام کردن بۆ دەرمانو
نەخۆشخانەی تایبەتایبەتەکان ، هەر لە تابلۆی سەر کلینیکە تایبەتەکانەوە تا ڕێکلامی
تەلەفزیۆنی وچاپکراو کە ئەم بابەتە لەزۆرێک لە ولاتانی جیهاندا ڕێگەپێدراو نیە ،
ئەمانەوە گەڵێک کەموکورتی تر کە ڕەنگە ئێمە پەیمان پێنەبردبێ ، بەپێی
ئەوزانیاریانەی بەردەستی ئێمەکەوتون ، مانەوەی شەوێک لەسەر تەختێکی نەخۆشخانەی
تایبەت لە ( ٧٠٠٠٠٠) حەوسەد هەزاردینارەوە دەست پیئەکات ، ئەمە جگە لە پەرداخێ ئاو
بە چەند بەرامبەرە مەرحەبای پزیشکێ ( ٥٠٠٠٠) پەنجا هەزاردینارە ، سەیرەکە لەوەدایە
کە هەندێجار دوو پزیشک بەیەکەوە سەردانی نەخۆشێک ئەکەن هەردوکیشیان ئیمزا لەسەر
تەبەلەکە ئەکەن واتە ( ١٠٠٠٠٠) سەد هەزار دینار ، هەر لەم سسەردەمی ئەم پەتایەدا
نەخۆش هەیە فاتورەکەی دوای مردن سەرو هەشتا ملێۆن دینار بوە ، ئەمە بۆ کەسێک کە
توانای دارایی باش بێت ڕەنگە ئاسایی بێت، بۆیە جێی خۆیەتی بپرسین ، ) ئەو
کارمەندەی بڕی (٢٤) موچەی وەرنەگرتوە و لە ٢٠١٥ تا ٢٠٢٠ یەک موچەی بە ڕێکوپێکی
وەرنەگرتوە یا ئەو خانە نشینەی کە موچەکەی لە (٥٠٠٠٠٠) پێنچ سەد هەزار دینار
تێپەڕناکات ، یاخود ئەو پێشمەرگەیەی کە موچەکەی ناگاتە ملێۆنێک دینار ئەگەر خۆی یا
یەکێک لە ئەندامانی خێزانەکەی پێویستی بەچارەسەر بێت ڕولەکوێ بکات ؟ کوا مافی
هاوڵاتی بون ؟ تاکە مافێک کە بۆی بەرجەستە کراوە ( مافی مردنە ) ! هەربۆیە کاتێک
کەرتی تایبەت ڕێکلام ئەکات ، ئەم بڕگەیەشی بۆ زیاد بکەن ، ئەگەر پارەت نیە ( مافی مردن بەردەستە ) لەبەر ئەوەی هاوڵاتی ئەم هەرێمەیت مافەکانت
پارێزراون .