سلێمانی شارەکەی پەنجا ساڵ لەمەو پێشە؟

دلاوەر عەلی سۆفی کەریم
  2022-01-08     497

ئازیزان ئەم چەند دێڕە یادەوەریەکە پێم وابێت لە بیرەوەری زۆرکەسدا مابێت ڕەنگە زۆریشیان پێیان خۆش بێت ، تەنها ئەوانە نەبێت کە بەهۆی ئەم یادەوەریە سەرکێشەی منەوە ڕاستی تەمەنیان دەر ئەکەوێت ، بەڵام با پێشەکی بڵێم هەرچیان وتو ئەڵێن گەردنیان ئازاد بێت .

زۆرمان ئەگەر بایاننامەی یانزەی ئازارمان بیر نەیەت ئەوا مێژوەکەی ئەزانین کە ساڵی ( ١٩٧٠ ) بوو ، پاش ئەوە بە دوو ساڵ نەوتی عێراق خۆماڵی ( تآمیم )کرا بەرنامەی سك هەڵگوشین (التقشف) ڕاگەیەنرا ، لەو کاتو ساتە ناسکەدا کۆمەڵێک مامۆستای دڵسۆزو ڕەسەنی ئەم شارە کۆمەڵێک کەڵە هونەرمەندی سلێمانی خولێکی مۆسیقایان لە قوتابخانەی گۆیژەی کوڕان لەسەر شەقامی مەولەوی کردەوە، پێش هەموو شتێک داوای لێبوردن ئەکەم ئەگەر هەندی ناوم لە یاد چوبێت ، ئەوانەش کۆچی دواییان کردوە ڕۆحیان شادوئاسودەبێ لە مامۆستاکان بەڕێوەبەری خولەکە مامۆستا ( عومەر عەلی ئەمین ) بوو، مامۆستاکانیش ، مامۆستا ولیەم یۆحەننا ، مامۆستا فرەنسیس داود ، مامۆستا خالید سەرکار ، مامۆستا سەڵاح ڕەووف ، مامۆستا فەرید عیسا وئەلبێرتی برای هەندێکی تریش دووبارە بمبورن لەم جەنجاڵیەی ئێستادا لۆمەم مەکەن ئەگەر پاش پەنجا ساڵ هەر ئەوەندەم بیر مابێت ، ئێمەی قوتابیانیش ئەم ناوانەم لە بیر ماوە باقیەکەی جێئەهێڵم بۆ ئێوەو وێنەکان، مامۆستا فوئادی حەمەئەمین ئاغا کە خۆی هاوڕێی مامۆستا عومەری بەڕێوەبەریش بوو ، مامۆستا حەسەن گەرمیانی گۆرانی بێژ ، کاک هوشیار ناسراو بە وشەبابە ، کاک ئاراس حسێن دارتاش ، کاک جەمالی سۆفی کەریمی سەراج ، کە ماممە ، کاک ئەنوەری عەبدوڵای مەلا ڕەشید و  زۆرێکی تروو بەندەش ، ئەگەر یادەوەریەکانم ژەنگ لێی نەدابن خولەکە بۆ سێ مانگەی هاوین بوو ، پێم وابێت بە پارەی ئەو ڕۆژەش بەشداری کردن بۆ هەر قوتابیەک سەرجەم چوار دینارو نیو بوو ، بەیانیان لە سەعات نۆ دەستی پێ ئەکردو لە سەعات دوانزە کۆتایی ئەهات ، بەڵام وەک دکتۆر عەلی کەریم لە ڕۆمانی سالە شێتدا ئەڵی ئەوی لەم شارەدا روئەدا لە هیچ کوێیەکی دنیادا ڕونادا، ئەو هەمو مامۆستا دلسۆزو بە ئەمەکەی شار بەو پەڕی دسۆزیەوە هەولیان لە گەڵ ئەداین لە پرۆڤەو لە لۆژیکی مۆسیقا لە وانەی نۆتەو پەیژەو هەمو ئەو بوارانەی مۆسیقا ، بە پراکتیکو بە وانەی نەزەریەوە تەنانەت مێژووی مۆسیقاشیان پێئەوتین، بەڵام سەیرەکە لەوەدا بوو کەسێک کە ئەویش هەر مامۆستا بوو جار بەجارێک پەیدا ئەبو بەناوی چەند تێبینیەکەوە ئەبوە هۆی سەرلێشێواندنمان ، بە هەرحاڵ هەرکەس بەڕیی خۆی پاش ئەم تەمەنە لە ڕیی گلەییشدا نەماوە ، ئەو خولە هەمو جۆرە ئامێرەکانی لە خۆ گرتبوو ، وەک بێتەوە یادم مامۆستا فوئاد ئەیویست فێری ئۆکۆردیۆن ببێت ، ڕۆژیکیان مامۆستا فەرید نۆتەیەکی تۆزی چڕو قەرەباڵغی لەسەر تەختە ڕەشەکە بۆ نوسیبون ، منیش لە پۆلەکەی خۆمانەوە چوبوم بۆ پۆلەکەی ئەوان ، لەو کاتەدا بەڕێوەبەر کە مامۆستا عومەر بوو  هات فوئادەفەنی وتی مامۆستا وەڵا من شکاتم هەیە لە مامۆستا فەرید،عومەرەفەنیش بە سەر سوڕمانێکو زەردەخەنەیەکەوە وتی خێر خۆ بێحەیاییت نەکردوەو لێی دابیت ، وتی نەوەڵا ئەوندەمان دەرسی قورس پێئەڵێت و نۆتەی قورسمان بۆ ئەنوسێتەوە خوام نەبێت من شەش پەنجەشم هەبێت ئەو نۆتەیەم بۆ لێنادرێ ، ئیتر بو پە پێکەنین ، هەروا دێتەوە یادم ڕۆژێکیان مامۆستا عومەر عودێکی لە یەکێک لەقوتابیەکان وەرگرتو دەستی کرد بە ژەنینی ، ئاوازێکی خۆشی دا بەگوێماندا مامۆستا ولیەم کە زۆر هاوڕێی بو وتی عومەرە فەنی خۆت دەر نەخستوە ئەمەش ئەزانیت ، ئەویش زۆر بە سادەیی وتی هیچ نیە هەر دەنکە دەنکەیەکە ، هەر لەو ڕۆژگارەدا بە هۆی تەئمیمی نەوتەوە هیچ کەلو پەلێک هاوردەی عێراق نە ئەکرا جگە لە پێداویستی زۆر گرنگ نەبوایە وەک دەرمانو هەندێ پێویستی زەروری تر نەبێت ، ئامێرە موسیقیەکان ئەگەر هەبوایە ئەوا لە شاری بەغداد دەست ئەکەوت ، لە یادمە هاوڕێیەکم کاک بەختیاری برایمی فەتاح هەرمنی ئامێرێکی کەمانچەی هەبو من سودم لەوە وەر ئەگرت ، خودی خولەکەش سودیان لە  هەندێک ئامێری ئەوسای چالاکی قوتابخانەکانو پەروەدەو ئامێری زیادەی مامۆستکان وەر گرتبو، باوکم بەهۆی ئیشوکارەکانیەوە زوو زوو سەردانی بەغدای ئەکرد ، زۆر گەڕابو کە کەمانچەیەکم بۆ پەیدا بکات دەستی نەکەوتبوو ، هاتەوە کابرایەکی ناسیاوی هەبو لە بانە لە دیوی ئێران جوابی بۆ نارد کە کەمانچەیەکی ئەڵمانی بەپێی ئەو تایبەت مەندیانەی مامۆستا ولیەم بۆی نوسیبوم ، بۆ بهێنێت ، بەڵی پاش ماوەیەک کەمانچە  گەشت بوم بە خاوەنی کەمانچەی خۆم ، ساڵی (٢٠٠٥ ) بۆ ئیشێکی بازرگانی خۆم ڕێم کەوتە لای بازرگانێکی بەتەمەن ، پاش یەکتر ناسینەوە  و چاخواردن وتی من گلەییم لێت هەیە  ڕەنگە ئەو ئیشەشەت بۆ نەکەم  بەسەر سوڕمانەوە لێم پرسی بۆ ؟ خێرە ؟  وتی من قەتار چیو وڵاخدار بوم لە بانەوە بارم ئەهێنا بۆ سلێمانی باوکت کابرایەکی ئاشنای خۆی کە خەڵکی بانە بوو ڕاسپاردبوو عودێکت بۆ بکڕێت (هەڵبەت ئەو بازرگانە بە کەمانچەشی ئەوت عود )، لەبانە عودم وەرگرتو کابرای بانەیی وتی دەستم دامێنت ئەمە لە هێلکە ناسکترە ئەبێ بەسەلامەتی بگاتە جێی خۆی منیش لە بەر ئەوەی باوکیشتم خۆش ئەویستو کابرای بانەییش ، هێسترێکم بەتەنیا بۆتەرخان کرد دیارە کاری قەتارچێتیو وڵاخداری بە چەند کەسێک ئەڕوا بەڕێوە بە ژمارەیەکی زۆر هێسترو قاتر ، هە  لە بانەوە تا گەیاندمە سلێمانی من هاوارم لە هاوڕێکانم کرد ، بۆخاتری خوا ئەو عودە نەشکێت تا بە سەلامەتی گەیاندمە دەستت ئیتر ناهەقمە گلەییت لێبکەم ، منیش سوپاسم کردو هەندێ قسەی خۆشمان کردو کارەکەشی بۆ ئەنجام دام ڕۆحی شاد بێت ، بێینەوە بۆ خولی مۆسیقاکە من بۆ خۆم کە کەمانچەم ئەخوێند مامۆستا خالید سەرکارو مامۆستا فرەنسیس داود دەرسیان پێ ئەوتم ئیشتاس سوپاسیان ئەکەم جێگەی شانازیمن ، چەند ئاوازێکیشیان فێر کردم ، لەوانە باران بارانە، ئەی چۆلەکەی پاساری، هەی نار ،بەڵام بەداخم کە ئەو کەسەش پەیدا بوبو لێمان کە بە ناوی تێبینیەوە ئەبوە هۆی سەر لێتێکدانمان یەکێک لە هۆکارەکانی بەردەوام نەبونم ئەوەبو. هەرچەندە خولەکەمان بەباشی بڕی وەک بڕوانامەش نوسراوێکیان پێبەخشین هەرچەندە من بۆ خۆم لام نەماوە و فەوتاوە بەڵام دڵنیام کە رەنگە هەندێک لە هاو پۆلەکان مابێتیان  بەڵام لە کۆتاییدا چەند وێنەیەکمان بۆیادگاری چرکاند لێرەدا ئەم سیانەیان ئەخەمە بەر دیدی خوێنەرانی ئازیز، ئەوە کلتورو نەریتی هونەری سلێمانی بوو ئەو  کەڵە پیاوو کەڵە هونەرمەندانەی تیا هەڵکەوتبو ، ئیستاش گوێم لە هەندێ دەنگی ناسازو زبر دەبێت ئەیانەوێت مۆسیقا حەرام بکەن ئەیانەوێ گۆرانی بخنکێنن ، ئەیانەوێت جوانی بکوژن ئەگەر بۆیان بکرێ و بلوێ  ئەوا گوڵی باخچەکانیش هەڵئەپروکێین ، با بزانن سلێمانی شاری پیرەمێردو گۆرانە لێوان لێوە لە جوانی ناشیرینی قبوڵ ناکات.

.  

زۆرترین بینراو
© 2022 Awene Online, Inc. All Rights Reserved.
×