هیچ بیانوییەک نه‌ماوەو ئیتر کاتی بەستنی کۆنگرەو نوێبونەوەی یەکێتیە
شاناز ئیبراهیم ئه‌حمه‌د
2019-05-03 1226
بۆ به‌رێزان
ئه‌نجومه‌نی سه‌ركردایه‌تی یه‌كێتی نیشتمانی كوردستان
هه‌ڤاڵانی بەڕێزم، سڵاوێکی گەرم
وەک لای هەمووان ئاشکرایه ساڵانێکە یەکێتی بەدەست چەندین کێشەی ناوخۆیی جۆراوجۆره‌وه دەناڵێنێ ، هەڵبەت هۆکاری هەموو کێشەکانیش ڕوونە کە (نەبەستنی کۆنگرەیە) ، کۆنگرەیەک کە یەکێتی بگەڕێنێتەوە سەر ڕێڕەوی ڕاستەقینەی خۆی کە لە خزمەت خەڵک و جەماوەری یەکێتی و لەئاست گۆڕانکارییە گرنگەکانی کوردستان و ناوچەکەدا ڕۆڵی کارا و کاریگەری هەبێت…
بێگومان لەماوەی ڕابردوودا چەندینجار داواکاری و هەوڵی بەستنی کۆنگرە هەبووە بەڵام بەداخەوە هەرجارێکیش بەبیانووی جیاواز بەرپەرچی ئەو خواستە دراوەتەوە..!!
ووتمان کۆنگرە : ووتتان جارێ شەڕی داعشە
ووتمان کۆنگرە : ووتتان قەیرانی داراییە
ووتمان کۆنگرە : ووتتان یەکڕیزی کورد تەواو نیە
ووتمان كۆنگره : ووتتان له‌گه‌ڵ پارتی سه‌رقاڵی ته‌ڵاقدانی به‌غدان
ووتمان کۆنگرە : ووتتان جارێ وەزعی کەرکوک خراپە
ووتمان کۆنگرە : ووتتان ترسی جیابوونەوە هەیە
ووتمان کۆنگرە : ووتتان با هەڵبژاردنی عێراق بکرێ
ووتمان کۆنگرە : ووتتان با هەڵبژاردنی کوردستان بکرێ
ووتمان کۆنگرە : ووتتان با جەماعەتی هاودیدان بێنەوە
ووتمان کۆنگرە : ووتتان با سەرۆک کۆمار هەڵبژێرین
ئەگەر بیرتان بێت ساڵی پار بە بەشداری ئەنجومەنی ناوەند و گشت ئۆرگانەکان و جەماوەری یەکێتی بڕیار بوو لەساڵیادی ڕاپەڕینە مەزنەکەی کوردستاندا مژدەی دیاریکردنی ڕۆژی کۆنگرە بدەین بەگوێی خەڵک و یەکێتییەکاندا ، بەڵام لەسەر داوای بەڕێز جێگری سكرتێری گشتی ڕاگەیاندنی ڕۆژی بەستنی کۆنگرە دواخرا..
ئەوکات بەڕێزیان داوای ٤٨ سه‌عات مۆڵه‌تیان كردو وا ١٠،٢٢٤ ( ده‌هه‌زارو دوو سه‌دو بیست و چوار) سه‌عات واته ٦١٣،٤٤٠ (شه‌ش سه‌دو سیانزه هه‌زارو چوار سه‌دو چل چركه ) بەسەر داواکاریەکەی بەڕێزیاندا تێدەپەڕێ..!!
ئەی ئێستا چی ؟ هیچ بیانوویەک ماوە ؟ بێگومان نەخێر ..!! ئیتر کاتی بەستنی کۆنگرە و نوێبوونەوەی یەکێتیە ، پێویستە هەمووان بە ئەرکی مێژوویی خۆمان هەڵسین و بەزووترین کات مژدەی ڕۆژی بەستنی کۆنگرە بدەین بە کەسوکاری سەربەرزی شەهیدان و خەڵک و جەماوەری یەکێتی..
بێگومان یه‌كه به یه‌كه‌تان و جێگری سکرتێری گشتی زیاتر لەهەرکەسێک بەرپرسیارێتیتان ئەکەوێتە ئەستۆ و ئومێدەوارم كه بە ئەرکی خۆتان هەڵبستن ، لەپێناو ئاسودەکردنی ویژدانی خۆتان و ئارامی ڕوحی بەرزەفڕی سەرۆک مام جەلال و بەزووترین کات ڕۆژی بەستنی کۆنگرە دیاری بکەن تاوه‌كو یه‌كێتیه‌كه‌مان بكه‌وێته‌وه سه‌ر رێڕه‌وه راسته‌كه‌ی خۆی و چیتر جەماوەر و كه‌سوكاری سه‌ربه‌رزی شه‌هیدان و کادرانی یەکێتی لە دڵەڕاوکێ و چاوەڕوانی بەستنی کۆنگرەدا له‌وه زیاتر بێ هیوا نه‌بن لەحیزبەکەی خۆیان و مام جەلالی گەورە و ڕابەرمان ..!
شاناز برایم ئەحمەد
٣-٥-٢٠١٩