سیروان بارزانی، فەرماندەی میحوەری گوێڕ-مەخموری هێزی پێشمەرگە ده‌ڵێت، مەترسییەکانی داعش بەردەوامە و جموجۆڵ و ئۆپەراسیۆنیان هەیە، سەرباری ئەوەی ئایدۆلۆژیاکانی بۆ ئایندەش پڕ مەترسییە.
ئاوێنه: سیروان بارزانی لەساڵیادی ئازادکردنی گوێڕ-مەخمور، رایگه‌یاند، جموجۆڵەکانی داعش بەردەوامە و مەترسیی جدییە، پێویستە شەڕی ئایدۆلۆژیا و سەربازیی داعش بکرێت چونکە ئایدۆلۆژیا توندڕەوییەکەی ماوە و مەترسییەکە بەردەوامە، ئەوان لە دەرفەت دەگەڕێن گورز لە خەڵکی سڤیل و هێزەکانی ئەمنی بدەن بەتایبەت لەو شوێنانەی کە بۆشایی ئەمنی هەیە.
وتیشی، ئازادکردنی داعشەکان لە سووریا، مەترسی لەسەر عێراق و هەرێمی کوردستان دروست دەکەن، چونکە مۆراڵ دەداتە شانە نووستووەکانیش کە دەبنە مەترسیی لەسەر ئاسایشی هەموو ناوچەکە.
دەشڵێت، هێزەکان ناتوانن ئەو بۆشاییە ئەمنییە کۆنتڕۆڵ بکەن کە لەنێوان هێزەکانی پێشمەرگە و سووپای عێراقی هەیە، پێویستە لیوا هاوبەشەکان ئەو بۆشاییە ئەمنیە تپڕ بکەنەوە.
لەبارەی پشتیوانی هاوپەیمانانیش سیروان بارزانی وتی، پشتگیریی هاوپەیمانان لەبیر ناکرێت بۆ پێشمەرگە بەتایبەت لە ئازادکردنی گوێڕ و مەخموور، ئێستەش پشتیوانییەکانی ئەمەریکا و هاوپەیمانان بەردەوامە وەک پێدانی چەک بە پێشمەرگە.