ئاسایشی هەولێر رایگەیاند، لەسەر بازرگانیكردن بە ماددەی هۆشبەر دەرمانخانەیەكیان لە شارەكە داخستوەو دو كەسیشیان لەسەر هەمان تۆمەت دەستگیركردون كە یەكێكیان یاریدەدەری پزیشكی دەرمانخانەیە.
ئاوێنە: بەڕێوەبەرایەتی ئاسایشی هەولێر لە راگەیەندراوێكدا وتی، دوای ئەنجامدانی بەدواداچون لە لایەن تیمەکانمانەوە بەهەماهەنگی لەگەڵ لێژنەی کوالێتی کۆنترۆڵی دەرمان لە وەزارەتی تەندروستی، بەفەرمانی دادوەری لێکۆڵینەوەی ئاسایشی هەولێر، دەرمانخانەیەکمان داخست و دو تۆمەتبارمان دەستگیر کرد بەناوەکانی (أ. م. ب.) کە یاریدەری پزیشکی دەرمانخانەیە و تۆمەتبار (أ. ع. أ.).
ئەوەشی خستۆتەڕو، تۆمەتبارانی ناوهاتو هەڵساون بە بازرگانیکردن بەدەرمانی هۆشبەرو کارتێکەرە هۆشیەکان و بەبێ پسولەی پزیشک و دور لە ڕێنماییە پزیشکییەکان و فرۆشتن و پێدانی بە کەسانی ئالودەی ماددەی هۆشبەر.
ئاسایش ئاماژەی بەوەشداوە، هەروەها لە کاتی پشکنین بۆ دەرمانخانەکە دەرکەوت ژمارەیەکی زۆر دەرمانی قاچاخ و ڕێگە پێنەدراوی تەندروستی لە دەرمانخانەکەی هەیەو دەستی بەسەردا گیراو پاشان رێوشوێنی یاسایی دژی دەگیرێتەبەر.