وەلید جانبولاد، سیاسەتمەداری لوبنانی و سەرکردەی دروز سەردانی دیمەشقی کردو لەگەڵ ئەحمەد شەرعی سەرۆكی ئەو وڵاتە بۆ قۆناغی ڕاگوزەر كۆبۆوە، ئەوەش لەكاتێكدایە پێكدادانی نێوان هێزەكانی شەرع و دروزەكانی سوریا لەچەند ڕۆژی ڕابردودا پەرەیسەند و ژماریەك كوژراوی لێكەوتەوە.
ئاوێنە: سەردانەکەی جانبولاد بۆ دیمەشق دوای چەند ڕۆژێک لەسەرهەڵدانی پێکدادان لە ناوچەکانی باشوری پایتەختی سوریا دێت، لەوانە جەرامانا و سەحناو سوەیدا، کە بە هۆیەوە دەیان کوژراو و برینداری لێکەوتەوە.
ئەنجومەنی ئایینی دروزەکان لەبەیروتی پایتەختی لوبنان کۆبونەوەیەکیان ئەنجامدا بۆ تاوتوێکردنی کاردانەوەی ئەو هێرشانەی کە ئەندامانی کۆمەڵگەی دروزەکانی لە جەبەل ئەلعەرەب کردە ئامانج و ئاڵۆزییەکانی ئەم دواییەی سوریا.
ئامانجی کۆبونەوەکە داڕشتنی هەڵوێستێکی بەکۆمەڵ بو کە هاوتەریب بێت لەگەڵ هەوڵە سیاسی و ئایینییە بەردەوامەکان بۆ کۆنتڕۆڵکردنی قەیرانەکە و ڕێگریکردن لە تێکچونی دۆخی ئەمنی.