بەرپرسانی روسیا یەک لە دوای یەک لێدوانیان سەبارەت بەشەڕی ئێران و ئیسرائیل راگەیاندو هۆشدارییان دا بەئەمەریکا کە دەستوەردانی لەشەڕەکەدا، رۆژهەڵاتی ناوەڕاست نائارامتر دەکات، ماریا زاخارۆڤا وتەبێژی وەزارەتی دەرەوەی روسیا ڕایگەیاند "بەهۆی هێرشەکانی ڕۆژانەی ئیسرائیل بۆ سەر دامەزراوە ئەتۆمییەکانی ئێران چەند ملیمەترێک لەکارەساتێکەوە دوورین".
 

ئاوێنە: لەکاتێکدا کۆمەڵگەی نێودەوڵەتی لەنزیکەوە بەدواداچوون بۆ شەڕی ئیسرائیل و ئێران دەکات، چەند کاربەدەستێکی روسیا ئەمڕۆ چوارشەممە لێدوان‌و هۆشدارییان دا بەئەمەریکا سەبارەت بەمەترسییەکانی ئەم رووداوە.

سێرگی ناریشکین، سەرۆکی دەزگای هەواڵگری دەرەوەی ڕووسیا (SVR) رایگەیاند "بارودۆخی شەڕی ئێران و ئیسرائیل لەئێستادا مەترسیدارەو پێویستە بەزووترین کات کۆتایی بەم شەڕە بهێنرێت".

جێگری وەزیری دەرەوەی روسیا، سێرگی ڕیابکۆڤ رەخنەی لەدەستوەردانی ئەمەریکا گرت‌و رایگەیاند "ئەمریکا هاوکاری ڕاستەوخۆی سەربازی ئیسرائیل دەکات، ئەمەش دەتوانێت دۆخی ڕۆژهەڵاتی ناوەڕاست بەشێوەیەکی ڕیشەیی تێکبدات‌و نائارامتری بکات".

بەپێی ئاژانسی هەواڵی ئینتەرفاکس، ڕیابکۆڤ ڕایگەیاندووە کە ڕووسیا هۆشداری داوە لەوەی ئەمریکا پشتیوانی سەربازی بۆ ئیسرائیل بکات.

هەروەها ماریا زاخارۆڤا، وتەبێژی وەزارەتی دەرەوەی ڕووسیا ڕایگەیاند، "بەهۆی هێرشەکانی ڕۆژانەی ئیسرائیل بۆ سەر دامەزراوە ئەتۆمییەکانی ئێران چەند ملیمەترێک لە کارەساتێکەوە دوورین".