وەزیری دەرەوەی ئیسرائیل رایگەیاند، رەجەب تەیب ئەردۆغان، سەرۆككۆماری توركیا كە خۆی ژمارەی پێوانەیی تۆماركردوە لە سەركەوتكردنی ئازادی و مافی هاوڵاتیانی، كەچی بەردەوامە لە لێدوانە توندەكانی بەرامبەر بە ئیسرائیل و سەرۆك وەزیرانەكەی.
ئاوێنە: گیدۆن سائر، وەزیری دەرەوەی ئیسرائیل، ئەمڕۆ چوارشەممە، لە تۆڕی كۆمەڵایەتی ئێكس، نوسیویەتی: ئەردۆغان كە خۆی بە سوڵتان دەزانێت، بەردەوامە لە گوتارە ئاگرینەكانی و دنەدان لەدژی ئیسرائیل و سەرۆك وەزیرانەكەی.
وتوشیەتی، ئەردۆغان خۆی ژمارەی پێوانەیی تۆماركردوە لە سەركوتكردنی ئازادییەكان و مافی هاوڵاتیانی و دژایەتی ئۆپۆزسیۆن، كەچی جورئەت دەكات وانەی ئەخلاقی فێری ئەوانی تر بكات.
هێمای بۆ ئەوەش كردوە كە سەیرەكە لەوەدایە كەسێك كە خواستە داگیركارییەكانی ناشارێتەوەو هێرشی كردوە سەر باكوری سوریا و باكوری قوبرسی بە نایاسایی داگیركردوە، كەچی بەناوی یاساو ئەخلاقەوە قسەدەكات.
وەزیری دەرەوەی ئیسرائیل وتوشیەتی، كەمێك هوشیاریی كەسی بەهیچ شێوەیەك خراپ نییە.
ئەو قسانەی وەزیری دەرەوەی ئیسرائیل دوای ئەوە دێن كە ئەمڕۆ ڕەجەب تەیب ئەردۆغان، سەرۆک کۆماری تورکیا رایگەیاند: بنیامین نەتەنیاهۆ، سەرۆک وەزیرانی ئیسرائیل، لە مێژە ئەدۆلف هیتلەری تێپەڕاندوە، لە روی ئەو تاوانە كۆمەڵكوژیانەی ئەنجامیان دەدات.