کۆماری ئیسلامیی ئێران جارێکی تر ناوچە سنوورییەکانی هەرێمی کوردستانی عێراقی کردە ئامانج و بارەگاکانی کۆمەڵەی زەحمەتکێشانی کوردستانی مووشەکباران کرد.
ئاوێنە: ئەمجەد حسێن پەناهی، فەرماندەی سەربازیی کۆمەڵەی زەحمەتکێشانی کوردستان، ڕایگەیاند؛ ئەمڕۆ کاتژمێر 1:20ی پاشنیوەڕۆ، سوپای ئێران بە توندی دەستڕێژی موشکیی کردە سەر بارەگاکانی کۆمەڵە لە دوڵی ئاڵانە. پەناهی ئاماژەی بەوە کرد، سەرەڕای قورسی و توندیی هێرشەکە، هێزەکانی کۆمەڵە بەهۆی ئامادەباشی و جێبەجێکردنی ڕێوشوێنەکانی خۆپارێزییەوە توانیویانە لە زیانی گیانی بەدوور بن، و تا ئێستاش هیچ ئامارێکی فەرمی لەسەر قوربانییان ڕانەگەیەنراوە.
ئەم هێرشە نوێیە درێژەپێدەری زنجیرە هێرشە مووشەکی و درۆنییەکانی کۆماری ئیسلامیی ئێرانە بۆ سەر بنکە و ئۆردوگاکانی حیزبەکانی ڕۆژهەڵاتی کوردستان لە خاکی هەرێمی کوردستاندا.
بەپێی ئامارەکانی کۆمەڵە کە لە لایەن فەرماندە سەربازییەکەیانەوە خراوەتەڕوو، لە دەستپێکی پەرەسەندنی ململانێکان و شەڕی نێوان ئێران و ئەمریکاوە، گوشار و هێرشە سەربازییەکان بۆ سەر ناوچەکە بەڕێژەیەکی بەرچاو هەڵکشاون، بە شێوازێک کە تەنها بۆ سەر بارەگاکانی کۆمەڵە، زیاتر لە 102 مووشەک و درۆنی بێفڕۆکەوان بەکار هێنراون.
تا ئێستا لایەنە فەرمییەکانی هەرێمی کوردستان و حکومەتی عێراق هەڵوێستی فەرمییان لەسەر ئەم پێشێلکارییە نوێیە ڕانەگەیاندووە، لە کاتێکدا نیگەرانییەکان لەبارەی تێکچوونی دۆخی ئەمنی و بەئامانجگرتنی ناوچە مەدەنی و شاخاوییەکانی هەرێم لە لایەن تارانەوە ڕوو لە زیاتربوونە.