لە پەرلەمانی عێراق واژۆ بۆ هەمواركردنەوەی یاسای خانەنیشنی کۆدەکرێتەوە و لە ئەگەری پەسەندکردنی پرۆژەکەشدا، تەمەنی خانەنشینی دەکرێتەوە بە 63 ساڵ.
ئاوێنە: ئیبتسام هیلالی، ئەندامی لیژنەی یاسایی لە پەرلەمانی عێراق ڕایگەیاند، پەرلەمان بەرەو هەموارکردنەوەی یاسای خانەنشینیی یەکگرتوو دەچێت، ئەویش وەک وەڵامدانەوەیەک بۆ داواکارییەکانی خانەنشینان و چاککردنی ئەو مادانەی کە مافەکانیان رێکدەخەن.
ئەوەشی خستەڕوو کە چەند رۆژێكە واژۆ لەلایەن پەرلەمانتارانەوە کۆکراوەتەوە بە مەبەستی پێشکەشکردنی داواکارییەکی فەرمی بۆ سەرۆکایەتی پەرلەمان بۆ هەموارکردنەوەی یاسای خانەنشینی یەکگرتوو.
روونیشی کردووەتەوە، ئەم جوڵەیە بە ئامانجی پێداچونەوەیە بە ژمارەیەک لە مادەکانی یاساکەدا بە شێوازێک کە خزمەت بە توێژی خانەنشینان بکات.
ئیبتیسام هیلالی راشیگەیاند، لە دیارترین ئەو پێشنیازانەی کاری لەسەر دەکەن، هەموارکردنەوەی تەمەنی یاسایی خانەنشینبوونە بۆ ئەوەی بێتە 63 ساڵ لەبری 60 ساڵ، هاوشێوەی ئەوەی پێشتر کاری پێ دەکرا.
ئاماژەی بەوەش کردووە، مادەی دیکەش لە یاسای خانەنشینیدا هەن کە لەلایەن ئەندامانی لیژنەی یاسایی و پەرلەمانتارانەوە پێداچوونەوەیان بۆ دەکرێت.
ئەو پەرلەمانتارە دووپاتی کردەوە، هەموارکردنەوەی یاساکە دەبێت بارودۆخ و پێداویستییەکانی خانەنشینان رەچاو دەکات و دەستکارییەکان دادپەروەرانە بن و ئەنجومەنی نوێنەران کار لەسەر لێکۆڵینەوە لەو مادانە دەکات کە پێویستیان بە هەموارکردنەوە هەیە تاوەکو بەرژەوەندیی خانەنشینان بەدیبهێنێت و مافەکانیان بپارێزێت.