دەسەڵاتدارانی تورکیا تا ئێستا ٤٦ هەزار و ٤٩٠ مینی نەتەقیویان لە سنووری پارێزگای جۆلەمێرگ دەستنیشان کردووە؛ کە پارێزگایەکی زۆرینە کوردنشینی باکووری کوردستانە و لە ئێستاشدا ئۆپەراسیۆنی پاککردنەوە لەو ناوچانەدا بەردەوامە کە پێشتر بەڕووی هاووڵاتییاندا داخرابوون.
ئاوێنە: بەپێی زانیارییەکانی ئاژانسی دەنگوباسی «دەمیرئۆرێن»، پارێزگای جۆلەمێرگ خاوەنی ٥٤.١ ملیۆن مەتر چوارگۆشە زەوی چێنراو بە مین و ناوچەی گوماناوی بە بوونی تەقەمەنی نەتەقیوەیە.
پرۆسەی هەڵگرتنەوە و پاککردنەوەی مینەکان لەلایەن «ناوەندی نیشتمانی بۆ چالاکییەکانی مین لە تورکیا» (MAFAM) سەرپەرشتی دەکرێت، کە لە ساڵی ڕابردووەوە دەستی بە کارەکانی لە ناوچەکە کردووە و فەرماندەیی گشتیی جەندرمەش بە دابینکردنی هێز بەشداریی لە پڕۆسەکەدا دەکات.
تیمە پەیوەندیدارەکان، دوای باشتربوونی دۆخی ئەمنیی ناوچەکە، دەستیان بە کێوماڵ و پاککردنەوەی ناوچەکان لە مین و تەقەمەنییە نەتەقیوەکان کردووە و تەواوی ئەو مینانەی دەدۆزرێنەوە لە چوارچێوەی بەرنامەیەکی پلان بۆ داڕێژراودا پووچەڵ دەکرێنەوە.
رۆژی دووشەممەی ڕابردوو، پەرلەمانی تورکیا پڕۆژەیاسایەکی پەسەند کرد کە چوارچێوەیەکی یاسایی بۆ هەڵوەشاندنەوەی پارتی کرێکارانی کوردستان (PKK) و تێکەڵکردنەوەی زۆرینەی ئەندامەکانی لەخۆدەگرێت؛ ئەمەش بە بەرجەستەترین هەنگاوی دەستپێشخەریی ئاشتی دادەنرێت کە دوای ئەوە هات عەبدوڵڵا ئۆجەلان، ڕێبەری زیندانیکراوی پەکەکە لە شوباتی ٢٠٢٥ داوای لە گرووپەکە کرد چەک دابنێن و هەڵبوەشێنەوە. پەکەکە لە ئایاری ٢٠٢٥ بڕیاری هەڵوەشاندنەوەی خۆی ڕاگەیاند و دواتر دەستی بە دانانی چەک کرد، بەڵام یاساکە چارەسەری داواکارییە فراوانەکانی کورد بۆ مافە سیاسی و کولتوورییەکان یان دۆخی یاسایی ئۆجەلان ناکات.
ئەو زەوییانەی پڕۆسەی پاککردنەوەیان تێدا تەواو دەبێت، دوای پشکنینی وردی سەلامەتی، ڕادەستی خەڵک دەکرێنەوە و بەڕووی هاووڵاتییاندا دەکرێنەوە. بەرپرسانی ناوچەکەش پێشبینی دەکەن ئەم هەنگاوە ببێتە هۆی بوژانەوەی کەرتی کشتوکاڵ و ئاژەڵداری و چالاکییە ئابوورییەکانی دیکە لە گوندە زیانلێکەوتووەکاندا.
ئیبراهیم تاشیاپان، پارێزگاری جۆلەمێرگ ڕۆژی پێنجشەممە پڕۆسەی پاککردنەوەی لە قەزای چەلێ (چوکورجا) بەسەرکردەوە و لەلایەن بەرپرسانی سەرپەرشتیارەوە زانیاری و وردەکاریی کارەکانی پێدرا.
تاشیاپان ڕایگەیاند ئەم کارانە دەرفەت بە دانیشتووانی ناوچەکە دەدات دووبارە بە سەلامەتی زەوییەکانیان بەکاربهێننەوە و وتی: «ئێمە بە شێوەیەکی قۆناغ بە قۆناغ و سەلامەت ناوچە مینڕێژکراوەکان پاک دەکەینەوە و دەیانکەینەوە. ئەمەش ڕێگە بە هاووڵاتییانمان دەدات بە سەلامەتی لەسەر زەوی و گوندەکانی خۆیان دەست بە چالاکییەکانیان بکەنەوە.»