لە ڕووداوێکی توندوتیژیدا لە ڕۆژهەڵاتی کوردستان، ژنێکی تەمەن ٢٦ ساڵ لەلایەن هاوژینەکەیەوە گیانی لەدەستدا، هێزە ئەمنییەکانیش دەستگیرکردنی تۆمەتبارەکەیان دوای دەرکەوتنی بەڵگە پزیشکییەکان ڕاگەیاند.
ئاوێنە: بەگوێرەی ڕاپۆرتێکی «ڕێکخراوی مافی مرۆڤی هانا»، قوربانییەکە ناوی (نەدا جەلیلیان)ە و خەڵکی گوندی «وشتەپە»ی سەر بە شارۆچکەی بۆکانە، بەڵام دانیشتووی شارۆچکەی مەلێکان بووە لە پارێزگای ورمێ. ناوبراو دایکی منداڵێکی چوار ساڵانەیە و بەپێی زانیارییە بڵاوکراوەکان، پێش گیانلەدەستدانی ڕووبەڕووی لێدان و ئەشکەنجە بووەتەوە و پاشان خنکێنراوە.
ڕێکخراوەکە ئاماژەی بەوەش کردووە، تۆمەتبار لە قۆناغی یەکەمدا هەوڵی داوە هۆکاری مردنەکە بە خۆکوژی پێناسە بکات تا خۆی لە لێپرسینەوە بدزێتەوە، بەڵام دوای ئەنجامدانی پشکنینەکانی پزیشکی دادوەری و خستنەڕووی بەڵگە زانستی و یاساییەکان، تۆمەتی کوشتنی بە ئەنقەستی بەسەردا ساغ بووەتەوە و لەلایەن هێزە ئەمنییەکانەوە دەستبەسەر کراوە.
هاوکات لەگەڵ کاردانەوەی ئەم ڕووداوە، چالاکوانانی بواری مافەکانی ژنان هۆشداری دەدەن لە بەکارهێنانی دەستەواژەی باوی «کێشەی خێزانی» بۆ ڕووداوەکانی لەم جۆرە. بە بڕوای چالاکوانان، ئەم دەستەواژەیە دەبێتە هۆی پەردەپۆشکردن و کەمکردنەوەی قەبارەی ڕاستەقینەی توندوتیژیی ڕەگەزی. هەروەها جەخت لەوە دەکەنەوە کە نەبوونی چوارچێوەیەکی یاسایی تۆکمە، پارێزەر و کارا بۆ ڕێگریکردن لە توندوتیژیی ناو خێزان، یەکێکە لە هۆکارە سەرەکییەکانی بەردەوامی و هەڵکشانی حاڵەتەکانی ژنکوشتن.