بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان ڕاگەیەندراوێکی سەبارەت بە ڕەوشی کەشوهەوای ئەمڕۆ و سبەی هەینی بڵاوکردەوە و تێیدا ئاماژەی بە گۆڕانکارییەکانی پلەکانی گەرما و ئاراستەی با کردووە.

ئاوێنە: لە ڕاگەیەندراوەکەدا هاتووە، ئاسمانی هەرێمی کوردستان بەگشتی لەنێوان ساماڵ و پەڵە هەوردا دەبێت، لە هەندێک لە ناوچە شاخاوییەکانیش ئاسمان دەبێتە نیمچە هەور. ئاراستەی با بەرەو باکووری خۆرئاوا دەبێت بە خێرایی 10 تا 20 کیلومەتر لە کاتژمێرێکدا. مەودای بینین لە نێوان 8 تا 10 کیلومەتردا جێگیر دەبێت. پلەکانی گەرمای ئەمڕۆ بەگشتی نزیک دەبنەوە لە تۆمارەکانی دوێنێ، تەنیا لە ناوچەکانی سنووری ڕۆژهەڵات کەمێک بەرزبوونەوە بەخۆیەوە دەبینێت.

سەبارەت بە پێشبینییەکانی سبەی هەینی، کەشناسی ڕایگەیاندووە ئاسمان بە ساماڵی و پەڵە هەور دەمێنێتەوە، لەگەڵ ئەگەری بەرزبوونەوەی تۆزوخۆڵێکی سووک. خێرایی با لەسەرخۆ بۆ مامناوەند دەبێت و مەودای بینین کەمێک کەمدەبێتەوە بۆ 6 تا 8 کیلومەتر. پلەکانی گەرمای سبەی نزیک دەبنەوە لە تۆمارکراوەکانی ئەمڕۆ.

بەرزترین پلەکانی گەرمای پێشبینیکراو بۆ سبەی هەینی لە شار و ناوچەکانی هەرێم بەم شێوەیەی خوارەوە دەبن:

گەرمیان: 47 پلەی سیلیزی هەڵەبجە: 43 پلەی سیلیزی هەولێر: 42 پلەی سیلیزی دهۆک: 42 پلەی سیلیزی زاخۆ: 42 پلەی سیلیزی ئاکرێ: 42 پلەی سیلیزی چەمچەماڵ: 42 پلەی سیلیزی سلێمانی: 40 پلەی سیلیزی پیرمام: 39 پلەی سیلیزی حاجی ئۆمەران: 33 پلەی سیلیزی