کۆی گشتی ٣٧ تەرم لە ناوچەکانی هەرماتی ١ و هەرماتی ۲ لە پارێزگای مووسڵ، هەروەها لە ناوچەی حەویجە دۆزرانەوە. بەپێی وتەی بەرپرسانی پزیشکی دادوەری، سەرەڕای ئاماژەی شایەتحاڵەکان بۆ ناسنامەی تەرمەکان، پشتڕاستکردنەوەیان پێویستی بە جێبەجێکردنی رێکارە زانستییەکان هەیە.
ئاوێنە: دکتۆر یاسین کەریم، بەڕێوەبەری پەیمانگەی پزیشكی دادوەریی هەرێمی کوردستان رایگەیاند کە لە ناوچەی حەویجە ۱۷ تەرم و لە ناوچەی هەرماتی نزیکەی ۲۰ تەرم دۆزراونەتەوە. سەبارەت بە ناسنامەی قوربانییەکان ئاماژەی بەوە کرد، ئەگەرچی شایەتحاڵەکان باسیان لەوە کردووە کە تەرمەکان هی هێزەکانی پێشمەرگەن، بەڵام بەبێ ئەنجامدانی پشکنینی دی ئێن ئەی (DNA) ناکرێت بە فەرمی ئەو زانیارییە پشتڕاست بكرێتەوە.
دکتۆر یاسین سەبارەت بە ئاستەنگەکانی بەردەم پشکنینەکان روونیکردەوە کە ئەنجامدانی پشکنینی DNA تێچوویەکی دارایی بەرزی دەوێت و پێویستە حکومەتی عێراق تەمویلی باری دارایی پرۆسەکە بگرێتە ئەستۆ. هاوکات جەختیشی کردەوە کە وەک لایەنی پەیوەندیدار لە هەرێمی کوردستان، هەوڵەکانیان بەردەوام دەبێت بۆ بەکارهێنانی ڕێگەی دیکەی گونجاو بە مەبەستی یەکلاییکردنەوەی چارەنووسی تەرمەکان و پێناسەکردنیان.