لە لێدوانێکی رۆژنامەوانیدا کە ئەمڕۆ پێنجشەممە، 13ـی ئابی 2026، ئامانج جەلال، گوتەبێژی بەڕێوەبەرایەتی ئاوی سلێمانی، ڕاگەیاند، هۆکاری سەرەکیی دروستبوونی قەیرانی ئاوی ئەم دواییەی شارەکە، بۆ شکانی بۆری ئاوی (دووکان - سلێمانی) و لەکارکەوتنی یەکجاریی سێ پەمپی کۆنی پڕۆژەکە دەگەڕایەوە.
ئاوێنە: سەبارەت بە هەنگاوەکانی چارەسەرکردن، وتەبێژی بەڕێوەبەرایەتییەکە ئاماژەی بەوە کرد کە تیمە پەیوەندیدارەکان توانیویانە بە گوژمەی زیاتر لە 4 ملیار دینار، سێ پەمپی نوێ و پێشکەوتوو دابین بکەن و لە پڕۆژەکەدا جێگیریان بکەن، کە ئەمەش فاکتەری سەرەکی بوو بۆ کۆتاییهێنان بە قەیرانەکە و ئاساییبوونەوەی ڕێڕەوی دابەشکردنی ئاو.
ئامانج جەلال ڕوونکردنەوەی زیاتری دا و دیاری کرد کە لە قۆناغی یەکەمدا و لە ماوەی 48 کاتژمێری سەرەتای شکانی بۆرییەکەدا، ئاو بۆ بەشێکی زۆری گەڕەکەکانی سلێمانی گەڕێندرابووەوە، بەڵام پرۆسەکە لەمڕۆوە بە تەواوی کۆتایی هات و کێشەی ئاوی ئەو گەڕەکانەش چارەسەر بوو کە پێتر دواکەوتنیان تیادا ڕوویدابوو، لەوانەش:
گەڕەکی کانی با
گەڕەکی قڕگە
گەڕەکی سێتوان
گەڕەکی کازیوە
سەرجەم ئەو گەڕەکانەی دەکەونە دەرەوەی شەقامی 60 مەتری
لە ئێستادا بەڕێوەبەرایەتی ئاوی سلێمانی دڵنیایی دەداتە هاووڵاتییان کە پرۆسەی پێدانی ئاو بە شێوازە ئاساییەکەی خۆی بەردەوامی دەبێت بۆ سەرجەم ناوچەکانی شارەکە.