وتەبێژی حووسییەکانی یەمەن رایگەیاند، لە ماوەی ٤٨ کاتژمێری رابردوودا، فڕۆکە جەنگییەکانی سعوودیە ١٢٩ هێرشی ئاسمانییان کردووەتە سەر چەندین ناوچەی جیاوازی یەمەن.
ئاوێنە: ئەمڕۆ شەممە یەحیا سەریع، وتەبێژی سەربازیی گرووپی ئەنساروڵڵای حووسییەکانی یەمەن لە بەیاننامەیەکی کورتدا رایگەیاند "فڕۆکە جەنگییەکانی سعودیە لەماوەی ٤٨ کاتژمێری رابردوودا ١٢٩ هێرشیان بۆسەر یەمەن کردووە".
وتیشی "ئەو هێرشە ئاسمانییانە پارێزگاکانی تەعیز، مەئریب، حودەیدە، جەوف، سەعدە، عومران و حەجەیان کردووەتە ئامانج".
سەریع ئاماژەی بەوەشدا، کە فڕۆکە جەنگییەکانی سعودیە لە هەردوو بنکەی ئاسمانیی "خەمیس مشەیت" و "تائیف"ـەوە فڕیون، هاوکات هۆشداریی دایە ریاز و دووپاتیکردەوە، ئەو هێرش و دەستدرێژییانەی دەکرێنە سەر گەلی یەمەن بە بێ وەڵام و سزا تێناپەڕن.
ئەم پەرەسەندنە لە نێوان حوسییەکان و سعودیە لە کاتێکدایە، دوو رۆژە چەکدارە حووسییەکان گەرووی بابولمەندەبیان کۆنترۆڵ کردووە و رێگەی بازرگانی و هاتوچۆی کەشتییە نەوتهەڵگرەکان جگە لە گەرووی هورمز لە بابولمەندەبیشەوە راوەستاوە.