ڕۆژی یەکشەممە، دیمیتری پێسکۆڤ، گوتەبێژی کۆشکی سەرۆکایەتیی ڕووسیا (کرێملین) ڕایگەیاند، هەر تێکچوونێک لە سەقامگیریی بارودۆخی یەمەن، مەترسیی ڕاستەقینە دەخاتە سەر ئابووریی جیهانی.
ئاوێنە: لە وەڵامی پرسیاری ڕۆژنامەنووسان سەبارەت بە ئەگەری هەبوونی پەیوەندییەکی چاوەڕوانکراو لە ئاستی باڵادا لەگەڵ عەرەبستانی سعوودیە، پێسکۆڤ ڕایگەیاند: "ئەم دۆخە لێکەوتەی یەک لەدوای یەکی لێ دەکەوێتەوە. لە کاتی ئێستادا زۆر قورسە بتوانین قەبارەی زیان و کاریگەرییەکانی بۆ سەر ئابووریی جیهان بخەمڵێنین، بەڵام بێگومان بابەتێکی زۆر مەترسیدار دەبێت بۆ هەموو لایەک و لێکەوتەکانی لە ڕووی نەرێنییەوە قورس دەبن."
لە بەشێکی دیکەی لێدوانەکەیدا، پێسکۆڤ جەختی لەوە کردەوە کە بارودۆخی ناوخۆیی یەمەن هێشتا بە شێوەیەکی مەترسیدار ئاڵۆز و شێواوە، ئەمەش وا دەکات دۆخەکە ئەگەری ڕوودانی پەرەسەندنێکی گەورە و هەڵکشانی زیاتری گرژییەکانی لێ بکرێت.