ئێران داوای دەرکردنی حزبەکانی رۆژهەڵات لەهەرێمی کوردستان دەکات
  2021-08-11       934       

سکرتێری ئەنجوومەنی باڵای ئاسایشی نیشتمانیی ئێران، عەلی سەمخانی لەمیانەی کۆبوەنەوەی لەگەڵ فوئاد حسێن، وەزیری دەرەوەی عێراق داوای دەرکردنی حزبەکانی رۆژهەڵاتی کوردستانی لەهەرێمی کوردستان کردوەو رایگەیاندوە کە "هەرێمی کوردستان بوەتە لانەی "گروپە تیرۆریستەکانی بەرهەڵستکاریی ئێران".

ئاوێنە: میدیاکانی کۆماری ئیسلامی ئێران ئاماژە بەوە دەکەن کە عەلی شەمخانی سەبارەت بەوەی کە هەرێمی کوردستان بوەتە لانەی هێزە بەرهەڵستکارەکانی ئێران هۆشداری داوە بەفوئاد حسێن‌و وتویەتی "داوا لەدەوڵەتی عێراق دەکەین کە دەربارەی دەرکردنی حزبەکانی رۆژهەڵات لەهەرێمی کوردستان بەجددیتر بجوڵێت، تا ئێران خۆی ناچار بەدەستپێشخەریی لەدژی ئەو حزبانە نەبێ‌و هێرش نەکاتە سەریان".
شەمخانی وتویەتیشی "هەر هێزو گروپێک کە بیەوێ خاکی عێراق بۆ هەڕەشە کردن لەئاسایشی ئێران بەکاربهێنێت، بەتوندی بەرپەرچی دەدەینەوە".

حزبەکانی رۆژهەڵاتی کوردستان 37 ساڵ لەمەوبەرو دوای ئەوەی ئێران دەستی بەسەر ناوچەکانی رۆژهەڵاتی کوردستاندا گرتەوە، بارەگاکانیان بۆ هەرێمی کوردستان گواستوەتەوەو زۆربەیان لەکۆیەو زڕگوێز نیشتەچی بون. تا ئێستا زیاتر لە ٤٠٠ کەسی چالاکیان لەناو هەرێمی کوردستاندا لەدوای ١٩٩١ەوە تیرۆر کراوە.

زۆرترین بینراو
© 2024 Awene Online, Inc. All Rights Reserved.
×