بۆ ئەمساڵیش دیداری مێری لە هەولێر بەڕێوەچوو، بەڵام بارەگای بارزانی بێبەری بوونی خۆی و موڵکداری کۆڕبەندەکەی راگەیاند و دەڵێت "جێگەی داخە کە ئەمساڵ دیداری مێری بە شایستەیی میوانەكانی بانگهێشت نەکردووە".
ئاوێنە: بارەگای بارزانیی لەمیانی راگەیەندراوێکدا دەڵێت "لەبارەی بەڕێوەچوونی دیداری مێری ٢٠٢٦ لە شاری هەولێر، جێگەی داخە کە ئەم کۆڕبەندە ئەمساڵ نەیتوانیوە بە شایستەیی لە بانگهێشتکردنی میوانان و پەنێڵەکانیدا ڕەچاوی فرەلایەنیی سیاسی و بەشداریی لایەنە سیاسییەکانی بەشەکانی تری کوردستان بکات".
ئەوەش هاتووە "لە دیدارێکی ئاوا گرنگدا، پێویست بوو نوێنەرایەتیی دۆزی گەلی کورد لە بەشەکانی تری کوردستان بە بەشداریی سەرجەم لایەنەکان ڕەنگ بداتەوە".
بارەگای بارزانی ئاشکراشیکردووە "ئەم جۆرە مامەڵەکردنە نیگەرانیی خەڵکی تێکۆشەر و ڕەسەنی بەشەکانی تری کوردستانی لێکەوتووەتەوە و دەبێتە هۆی قووڵكردنی پەرتەوازەیی و دووبەرەکیی نێوان ڕۆڵەکانی گەلی کوردستان. هەموو لایەکیش ئاگادار دەکەینەوە کە (مێری) هیچ پەیوەندییەکی بە ئێمەوە نییە".