عەلا جبوری، وەزیری بازرگانی عێراق رایگەیاند، پرۆسەی بەبازاڕکردنی ئەمساڵی گەنمی جوتیاران سەرکەوتنی بەرچاوی بەدەستهێناوە، تا دوێنێ شەممە زیاتر لەدو ملیۆن تۆن گەنم وەرگیراوەو نزیکەی 70%ی شایستە داراییەکانیش دابەشکراون.

ئاوێنه‌: ئەمڕۆ یەکشەممە عەلا جبوری لەکۆنفرانسێکی رۆژنامەوانیدا رایگەیاند،"پرۆسەی بەبازاڕکردنی گەنمی ئەمساڵی جوتیاران، سەرکەوتنی گەورەی بەدەستهێنا، ئەمەش بەهۆی ئامادەکاری پێشوەختەی حکومەت بۆ رێوشوێنەکانی وەرگرتنی گەنم، هاوکات جوتیاران هەماهەنگی باشیان لەگەڵماندا هەبو، سوپاسیان دەکەین بۆ ئەو  هەماهەنگیەیان لەگەڵ حکومەت و پەرۆشیان بۆ بەبازاڕکردنی گەنم".

ئاماژەی بەوەشکرد،" کۆی بەرهەمی نیشتمانی تاوەکو دوێنێ گەیشتوەتە دو ملیۆن و  102 هەزار تۆن، بێگومان ئەو بڕەی وەرمانگرتوە زیاترە لە پێشبینییەکانمان، کە پێشبینی دەکرا بەهۆی گۆڕانی کەشوهەوا بەرهەم کەمتربێت".

سەبارەت بەشایستە داراییەکانی جوتیاران وەزیری بازرگانی ئاشکرایکرد،"سەرجەم شایستە دارییەکانی ساڵی 2021 دابەشکراوە، بۆ ئەمساڵیش نزیکەی  70%ـی دابەشکراوە، حەوت بۆ هەشت پارێزگا بە تەواوی شایستەکانیان دراوەتەوە، بەشێک لە پارێزگاکان بەهۆی درەنگ دەستپێکردنی پڕۆسەی بەبازاڕکردن تاوەکو ئێستا ماوە شایستەکانیان بدرێتەوە، بۆ ئەمەش هەماهەنگی تەواومان هەیە".