دوای ئەوەی وەزیری دارایی دزینی 3.7 ترلیۆن دیناری دەستەی باجی ئاشكراكرد، دەستەی دەستپاكیی عێراق روونكردنەوەی لەسەر دەدات.

ئاوێنە: دەستەكە لەبارەی ئەو نووسراوەی وەزارەتی دارایی عێراقەوە كە دوێنێ لەلایەن هەندێك لە میدیاكانەوە بڵاوكرایەوە و ئاراستەی دەستەكەیان كراوە رایگەیاند، دۆسیەكە لێكۆڵینەوەی تیاكراوە و لەئێستادا خراوەتە بەردەم دادگا.

ئاماژەی بەوەشكرد، دادگا بڕیاریداوە بە بانگكردنی گەورە بەرپرسانی وەزارەتەكە بۆ لێكۆڵینەوە لەبارەی ئەو كەلێنانەی لەو بوارەدا روویداوە و بووەتەهۆی دزین و بەهەدەردانی سامانی گشتی.

دوێنێ ئیحسان عەبدولجەبار وەزیری نەوت و وەزیری پێشووی دارایی بە وەكالەت ڕایگەیاند، ئەنجامی لێكۆڵینەوەكردن لە دزرانی 3.7 تریلیۆن دیناری تەواوكردووە و دراوە بە لایەنی پەیوەندیدار.

ئیحسان عەبدولجەبار وێڕای سوپاسكردنی كازمی بۆ پەسەندكردنی داوای بەخشینی لە پۆستی بەڕێوەبردنی وەزارەتی دارایی بە وەكالەت و وتیشی، “كۆمەڵێك كەسی دیاریكراو، بڕی 3.7 تریلیۆن دینار (2.5 ملیار دۆلار)یان لە پارەی باج لەناو بانكی رافیدەین دزیوە”.