ئایدن مەعروف داوا لەحكومه‌تی‌ هه‌رێم‌و بەغدا ده‌كات بودجەی تایبەت بۆ تورکمانەکان تەرخان بکەن
  2022-11-19       212       
ئایدن مەعروف

ئایدن مەعروف، ئەندامی مەکتەبی سیاسی بەرەی تورکمانی عێراقی‌و وەزیری ھەرێم بۆ کاروباری پێکھاتەکان لەحکومەتی هەرێم رایگەیاند، نوێنەرایەتی نەکردنی تورکمانەکان لەحکومەتی نوێی عێراق نادادپەروەرییە، هاوكات داوا لەحكومه‌تی‌ هه‌رێم‌و بەغدا ده‌كات بودجەی تایبەت بۆ تورکمانەکان تەرخان بکەن.

ئاوێنه‌: ئایدن مەعروف لەدیدارێکیدا لەگەڵ ئاژانسی ئانادۆڵ ڕایگه‌یاندووه‌، تورکمانەکان رۆڵێکی گرنگیان لەعێراق و ناوچەکەدا هەیە، هەمیشە هەوڵدەدەن بەرێگەی گفتوگۆو ئاشتییەوە مافەکانی خۆیان بەدەستبهێنن.

ئاماژەی بەوەشداوه‌، پێویستە حکومەتی نوێی عێراق جۆرە سیاسەتێک پەیڕەو بکات کە هیچ جیاوازییەک لەنێوان پێکهاتە نەتەوەیی و ئایینییەکاندا نەکات.

ئەندامه‌كه‌ی مەکتەبی سیاسی بەرەی تورکمانی ده‌ڵێت، بەپێی دەستوری عێراق تورکمانەکان سێیەم پێکهاتەی سەرەکین لەوڵاتداو هەمیشە خوازیاری حکومەتێکی سەقامگیرن، ده‌شڵێت، "بەداخەوە لەحکومەتی نوێی عێراقدا هیچ وەزارەتێک نییە کە نوێنەرایەتی تورکمانەکان بکات، سیاسەتێکی ناڕەواو دور لەدادپەروەریی لەدژی تورکمانەکان پەیڕەو دەکرێت".

ئایدن مەعروف ئاماژەی بەوەداوه‌ کە لەدوای ساڵی ٢٠٠٣ سیستمی ئێستای عێراق لەسەر ناسنامەی نەتەوەیی و مەزهەبی بنیات نراوە، بەبیری هێنایەوە کە پۆستەکانی سەرۆکایەتی کۆمارو سەرۆکوەزیران و سەرۆکایەتیی پەرلەمان بۆ عەرەب و کورد تەرخانکراوە.

مەعروف، بەشداریی پێنەکردنی تورکمانەکانی لەم هاوکێشە سیاسییەدا بە "نادادپەروەری" وەسف ده‌كات.

ناوبراو ئەوەشی خستۆتەڕو کە داوایان لەحکومەتی عێراق کردووە ئەم هەڵەیە راست بکاتەوە، له‌و ڕوه‌وه‌ وتویه‌تی‌، "پێویستە تورکمانەکانیش لەسەرۆکایەتی کۆمارو سەرۆکایەتی ئەنجوومەنی وەزیراندا پشکیان هەبێت، وەزارەتێک یان زیاتر بدرێت بە تورکمانەکان".

ئایدن مەعروف باسی لەوەش کردووه‌ کە پێویستە بودجە بۆ ناوچە تورکمانەکان دابین بکرێت، "بەڕاستی بوونی تورکمانەکان لەناوچە تورکماننشینەکان و بەتایبەت لەشاری کەرکوک زۆر گرنگە، لەرابردودا بەردەوام ئەم ناوچانە لەژێر هەڕەشە و پەلاماری رێکخراوە تیرۆریستییەکاندا بون. لەئێستادا ناوچە تورکماننشینەکان پێویستیان بەئاوەدانکردنەوە هەیە. بۆ ئەوەدانکردنەوە، قوتابخانە، زانکۆو پڕۆژەکانی تایبەت بەتورکمانەکان، پێویستە هەم حکومەتی عێراق و هەم حکومەتی هەرێم بودجەیەکی تایبەت دابین بکەن".
 

زۆرترین بینراو
© 2022 Awene Online, Inc. All Rights Reserved.
×