یەكێتی و گۆڕان جەخت لە "لێكتێگەیشتن بۆ چارەسەركردنی كێشەكان" دەكەنەوە
  2023-01-23       288       

نوسینگەی سەرۆكی یەكێتی رایگەیاند، ئەمڕۆ دوشەممە، لە كۆبونەوەی بافڵ تاڵەبانی و وەفدی باڵای بزوتنەوەی گۆڕاندا جەخت لە پاراستنی یەکڕیزی و لێکتێگەیشتن کرایەوە لەپێناو چارەسەرکردنی کێشەکان و زاڵبون بەسەر ئاڵنگارییەکاندا.

ئاوێنە: بەپێی راگەیەندراوێكی نوسینگەكەی، ئەمڕۆ بافڵ تاڵەبانی، سەرۆکی یەکێتیی نیشتمانیی کوردستان بەیاوەری رەفعەت عەبدوڵا، بڕیاردەری دەستەی کارگێڕی و فەرید ئەسەسەرد، سكرتێری ئەنجومەنی سەركردایەتی، سەردانی بزوتنەوەی گۆڕانی کردو لەلایەن عومەر سەید عەلی و وەفدێکی باڵای بزوتنەوەکەوە پێشوازیلێکرا.

لە راگەیەندراوەكەدا هاتوە"لە کۆبونەوەکەدا دوایین گۆڕانکارییە سیاسی و ئابورییەکانی هەرێم تاوتوێکران و جەخت لە پاراستنی یەکڕیزی و لێکتێگەیشتن کرایەوە لەپێناو چارەسەرکردنی کێشەکان و زاڵبون بەسەر ئاڵنگارییەکاندا."

هەر بەپێی راگەیەندراوەكە "لە درێژەی کۆبونەوەکەدا پتەوترکردنی پەیوەندییەکانی نێوان هەردولا جەختیلێکرایەوەو خێراترکردنی هەنگاوەکان بۆ چارەسەرکردنی کێشەکان لە بەغدا لەچوارچێوەی دەستورو دەستبەرکردنی ژیانێکی شایستە بۆ خەڵک بەپێویست زانرا."

زۆرترین بینراو
© 2023 Awene Online, Inc. All Rights Reserved.
×