مستەفا سەید قادر، جێگری سەرۆكی هەرێمی كوردستان، ئەمڕۆ سێشەممە، لەمیانی كۆبونەوەی لەگەڵ وەفدێكی كونسوڵخانەی ئەمریكا رایگەیاند، بارودۆخی ناوخۆیی و ناوچەكە ئاڵۆزە، بۆيه پێویستە ناکۆکییە لاوەکییەکان وەلابنرێن و په‌له بكرێت له چاکسازی و یەکخستنی هێزەكانی پێشمەرگە.
ئاوێنە: بەپێی راگەیەندراوێكی سەرۆكایەتی هەرێم، پێشنیوەڕۆی ئەمڕۆ سێشەمە، مستەفا سەید قادر، جێگری سەرۆکی هەرێمی کوردستان، پێشوازی لە وەفدێكى کونسوڵخانەی ئەمه‌ریکا لە هەرێمی کوردستان کرد کە لە پێكهاتبون لە کاترين کرۆفت و جۆسوا لویس و ڤێگەر ئەمیین، بەرپرس و ئەندامانی یەکەی سیاسی و ئابوریی كونسوڵخانەكە.
بەگوێرەی راگەیەندراوەكە، لە دیدارەكەدا باس لە بارودۆخی سیاسی و ئەمنی و ئابوریی عێراق و هەرێمی کوردستان و ناوچەکە کرا و تیشک خرایە سەر گرنگيی ڕێکكەوتن و پەیوەندییەکانی نێوان هەولێر و بەغدا و پرسی وزە، هه‌روه‌ها جه‌خت لە چارەسەركردنی ناکۆکیی نێوان لایەنە سیاسیيەکان، كرايه‌وه.
وەك لە راگەیەندراوەكەدا هاتوە، جێگری سەرۆكی هەرێم جەختی له‌وه کردەوە کە "بارودۆخی ناوخۆیی و ناوچەیی ئاڵۆزە، بۆيه بە لەبەرچاوگرتنی ئەو دۆخە، پێویستە ناکۆکییە لاوەکییەکان وەلابنرێن و په‌له له چاکسازی و یەکخستنی پێشمەرگەو باشتركردنى خزمەتگوزارييه‌كان بكرێت."
لە راگەیەندراوەكەدا هاتوە "هەردولا بە بایەخەوە باسیان لە بەردەوامی و بەرفراوانکردنی پەیوەنديیەکانی هەرێمی کوردستان و ئەمه‌ریکايان کرد و وەفدى کونسوڵخانەی ئەمه‌ریکا پشتیوانی و هاوکاريی وڵاتەکەیان بۆ هەرێمی کوردستان دوپات کردەوە، هه‌روه‌ها بە گرنگیيەوە باسیان لە سەقامگیريی سیاسی و ئەمنيی ناوچەكە کرد."