بەڕێوەبەرایەتی پۆلیسی سلێمانی دەستگیرکردنی دوو کەسی راگەیاند کە ویستویانە بەڵگەنامەی ساختە دروستبکەن و لە فەرمانگەکان بەکاریبهێنن.
ئاوێنه: بەڕێوەبەرایەتی پۆلیسی سلێمانی رایگەیاند:" دوای ئەوەی لەلایەن هێزەکانی پۆلیسەوە زانیاری لەسەر دوو تۆمەتبار کۆکرایەوە کە کاری ساختەکاری بەڵگەنامە و مۆر و دەفتەری رەگەزنامەی ساختە دروستدەکەن، لە چالاکییەکدا توانرا هەردوو تۆمەتبارەکە لەلایەن مەفرەزەکانی پۆلیسی نەهێشتنی تاوانی سلێمانی بە هاوکاری پۆلیسی فریاکەوتنو ئاسایش سلێمانی دەستگیربکرێن".
ئاماژەی بەوەشکرد:" لەکاتی دەستگیرکردنیشیاندا دەستگیرا بەسەر ژمارەیەک مۆر و رەگەزنامەی ساختەدا کە تۆمەتبارەکان بە نیاز بوون بەڵگەنامەی پێ ساختە بکەن و لە فەرمانگەکاندا مامەڵەی پێوە بکەن".
باسیلەوەشکرد:" لە ئیستادا هەردوو تۆمەتبار بە بڕفیاری دادوەر و بەپێی ماددەکانی ٢٩٨ و ٢٨٩ لە یاسای سزادان راگیراون و لێکۆڵینەوە لەگەڵیاندا بەردەوامە".