جوتیار عادل، وتەبێژی حكومەتی هەرێمی كوردستان رونكردنەوە سەبارەت بە پشوی باخچەو خوێندنگەو زانكۆ و پەیمانگاكان دەدات كە دوێنێ لەلایەن ئەنجومەنی وەزیرانی هەرێمی كوردستانەوە بڕیاری لێدرا.
ئاوێنە: جوتیار عادل، وتەبێژی حكومەتی هەرێمی كوردستان، ئەمڕۆ چوارشەممە، لە ڕونكردنەوەیەكدا رایگەیاند، دوابەدوای كۆبونەوەی رۆژی سێشەممەی ئەنجومەنی وەزیران، ئەنجومەن ژمارەیەك بڕیاری پەیوەست بەپشوی ناوەندەكانی خوێندن دەركرد، لەمبارەیەوە بەپێویستمان زانی ئەم رونكردنەوەیە لەبارەی ئەم بابەتەوە بخەینەڕو.
وتەبێژی حكومەتی هەرێمی كوردستان رونكردنەوەكەی لە چەند خاڵێكدا خستۆتەڕو و وتویەتی، پشوەكان بەم شێوەیەی خوارەوە دەبێت:
١. لە سەرجەم ناوەندەکانی خوێندن و باخچە و قوتابخانە و پەیمانگاکانی سەر بە وەزارەتی پەروەردە (حکومی و ناحکومی / ئەهلی) لە ڕۆژی چوارشەممە ڕێکەوتی ٢٠٢٠/٢/٢٦ تاوەکو ڕۆژی سێشەممە ڕێکەوتی ٢٠٢٠/٣/١٠ دەبێتە پشوی فەرمی، و (ڕۆژانی ١١ - ٢٠٢٠/٣/٢٣ پشوی ساڵانەی خوێندنە لە بەهار)، و ڕۆژی سێشەممە ٢٠٢٠/٣/٢٤ خوێندن لەو شوێنانە دەستپێدەکاتەوە.
٢. لە سەرجەم زانکۆ و پەیمانگاکانی سەر بە وەزارەتی خوێندنی باڵا و توێژینەوەی زانستی (حکومی و تایبەتەکان) لە ڕۆژی شەممە ڕێکەوتی ٢٠٢٠/٢/٢٩ تاوەکو ڕۆژی سێشەممە ڕێکەوتـی ٢٠٢٠/٣/٣١ دەبێتە پشـوی فەرمی (کە ڕۆژانی ١١ - ٢٠٢٠/٣/٢٣ لەخۆ دەگرێت وەک پشوی ساڵانەی خوێندن لە بەهار)، و ڕۆژی چوارشەممە ٢٠٢٠/٤/١ خوێندن لەو شوێنانە دەستپێدەکاتەوە.
٣. بەڕێزان هەردو وەزیری پەروەردە و خوێندنی باڵا و توێژینەوەی زانستی دەسەڵاتی قەرەبوکردنەوەی ئەو ڕۆژانەیان هەیە کە بە پشو ئەژمارکراون بۆ ساڵی خوێندنی ٢٠١٩ - ٢٠٢٠.
٤. وەزارەتی کار و کاروباری کۆمەڵایەتی دەسەڵاتی ڕێکخستنەوەی دەوامی دایەنگە و خوێندنگە و پەیمانگاکانی سەر بە وەزارەتیان پێ دەدرێت بە ڕەچاوکردنی بڕگەکانی ئەم بڕیارە و مەبەستەکانی دەرچونی.