جیهان.. ژمارەی گیانلەدەستدان بەهۆی ڤایرۆسی کۆرۆناوە ٧٠ هەزار کەسی تێپەڕاند
  2020-04-06       203       

تا ئێستا ٧٠ هەزار و ١٧٢ کەس لە جیهاندا بەهۆی ڤایرۆسی کۆرۆنای نوێ (COVID-19) گیانیان لەدەستداوە و زۆرترین قوربانیش لە ئیتاڵیا بووە.

ئاوێنه‌: ماڵپەڕی وۆلدۆمێتەر دوایین زانیاری لەبارەی توشبووانی ڤایرۆسی کۆرۆنای نوێ (COVID-19) لە جیهان بڵاوکردەوە و تیایدا ئەوە هاتووە کە تا ئێستا ٧٠ هەزار و ١٧٢ کەس لە جیهاندا بەهۆی ڤایرۆسەکەوە گیانیان لەدەستداوە و ژمارەی حاڵەتە تۆمارکراوەکانیش گەیشتوەتە ملیۆنێک و ٢٨٢ هەزار و ٤٠.

زۆرترین ژمارەی قوربانییەکانیش لە ئیتاڵیا بووە کە ١٥ هەزار و ٨٨٧ کەس بووە، دوای ئەویش ئیسپانیا بە ١٣ هەزار و ٥٥ کەس، ئەمریکا بە نۆ هەزار و ٦٢٠ کەس، فەڕەنسا بە هەشت هەزار و ٧٨ کەس، بەڕیتانیا بە چوار هەزار و ٩٣٤ و ئێران بە سێ هەزار و ٦٠٣ کەس دێن.

لە وڵاتی چینیش کە شوێنی دەرکەوتنی ڤایرۆسەکە بوو تا ئێستا سێ هەزار و ٣٣١ کەس گیانیان لەدەستداوە.

هەروەها لە هۆڵەندا هەزار و ٧٦٦ کەس، لە بەلجیکا هەزار و ٦٣٢ کەس و لە ئەڵمانیا هەزار و ٥٨٤ کەس بەهۆی ڤایرۆسی کۆرۆنای نوێ (COVID-19) گیانیان لەدەستداوە.

ڤایرۆسی کۆرۆنای نوێ (COVID-19) بۆ یەکەمجار لە کانوونی یەکەمی ٢٠١٩دا لە شاری وهانی چین دۆزرایەوە و تا ئێستا لە ٢٠٠ وڵات و هەرێمی جیهان بڵاوبووەتەوە.
زۆرترین بینراو
© 2020 Awene Online, Inc. All Rights Reserved.
×