رۆژی چوارشەممە ٢٦ی شوبات لە دادگای كەتنی هەولێرەوە پێڕاگەیاندنی ئامادەبوونی یەكەم دانیشتنی دادبینیم پێگەیەندرا، تا رۆژی یەك شەممە ١ی ئادار، كاتژمێر ٩:٣٠ بەیانی دادگایی بكرێم، لەسەر سكاڵایەكی بەناو یاسایی مەتین دلۆڤان ئدریس مستەفا بارزانی برازای سەرۆكی هەرێم.
لە بنەماوە ئەگەر خاتری پێگەی حزبی و بنەماڵەیی مەتین بارزانی نەگیرایە، دەبوو دادگا ئەو دۆسیەیەم لەسەر نەبوونی هیچ بەڵگەیەكی یاسایی بۆ تۆمەتباركردنم و بە زۆر سەپاندنی تۆمەت وەرنەگرێت.
ئەگەر مەتین لەسەر بنەمای بەدیهێنانی دادپەروەری ئەو كارە دەكات نەك بەكارهێنانی دادگا و یاسا بۆ تۆڵەكردنەوە لە من، بابێت دەستی دەگرم و بەیەكەوە سەرەتا دەچین لە ژوورەكانی دادگا وێنەی باپیرەكانی و باوك و ئامۆزاكانی لەسەر دیوار و مێزەكان لادەبەین.
سبەی یادی ٢٩ساڵەی راپەڕین دەست پێدەكات، بەڵام لەو یادەی شانازی بە رووخانی ستەمكاران دەكەین، ئەو دەسەڵاتەی لە بەرهەمی راپەڕین دروست بوو، رۆژنامەنووس و چالاكوانی بەرگریكار لە مافەكانی مرۆڤ و ئازادیخواز دادگایی دەكات بەبێ بوونی هیچ بەڵگەیەكی یاسایی.
بۆیە ئەگەر بە پۆینت سەروەری یاسا و خواستی بەدیهێنانی دادپەروەری مابێت لەلایەن دادوەران و دادگاكان لە هەولێر پێویستە ئەم دۆسیەیەم دابخرێت، چونكە ئەو دۆسیەی ناوبراو دەخوازێت وەك بابەتێكی سیاسی و بۆ سەركوتكردن لە دژم بەكاری بهێنێت نە سەرنووسەر و نووسەریم، بەڵام مەتین برازای سەرۆكی هەرێم ئەخوازێ بەپێی ماددەی ٢ی یاسای ژمارە ٦ی ساڵی ٢٠٠٨ی خراپ بەكارهێنانی ئامێرە ئەلیكترۆنییەكان و مۆبایل، لە ٦مانگ بۆ ٥ساڵ زیندانی بكرێم و، بە بڕی یەك ملیۆن بۆ ١٥ملیۆن دینار سزا بدرێم.
سبەی لە دادگای كەتن دەبم بۆ رەتكردنەوەی ئەو تۆمەتانەی بنەماڵەی بارزانی دەیانەوێت بەسەرمدا بیسەپێنن و من بكەن بە هۆكارێك بۆ ترساندنی هاووڵاتیانمان، هاوكات بەرگری لەو مافە گەردوونیانە دەكەم كە بەشێكیان لەناو یاساكانی هەرێمی كوردستان چەسپێندراون، بە ئومێدم دادگا بوێر بێت لە بەدیهێنانی دادپەروەری نەك پێچەوانەكەی.