خوێندكاری دوكتۆرا لە مێژووی نوێ و هاوچەرخ
بۆ کورد زۆر گرنگە ئەوەی لەبەرچاوبێت کە:
١- مافی مرۆڤ، کۆمەڵگەی نێودەوڵەتی و ...هتد، داردەستێکی دەستی زلهێزەکانە و چۆنیان بوێت لەبەرژەوەندی خۆیان بەكاریدەهێنن و پابەندی هیچ قیەم و بەڵێن و بەرپرسیارێتییەک نین، ئەگەر بیانەوێت جۆلانێیەکی داعش دێنن و دەیکەن بە شەرع و دەیکەنە سەرۆکی مەملەکەتێک و تەنانەت دەعوەتی کۆشکەکەشیانی دەکەن و عەترپرژێنی دەکەن، یان دەرگای زیندانیی داعشەکان دەخەنە سەرپشت و بەشێوەیەک خۆیان گیلدەکەن، ئەگەر دوو کیلۆمەتریش لێیانەوە دوربێت، نە دەنگیان دەبیستن و نەبە چاویش دەیانبینن. دواتریش دڕندە ئاسا بەریان دەدەنە گیانی هەرکەس و لایەنێک کەبیانەوێت. خوا هەڵناگرێت، ئەوانیش بۆ گیانی کورد، هیچ دڕندەیەکیان پێناگات.
٢- زۆر گرنگە کورد باش لەوەتێبگات، هەرکاتێک هەرکەسێک بەهەر ناو و ناونیشانێکەو ئایۆلۆژیایەکەوە بێت و لەبەغداد، تاران، ئەنقەرە و دیمەشق حاکم بێت، بەمەرجێک گوێڕایەڵی بێچەنوچوونی عەیارە بیستوچوار بێت بۆ ئەمریکا، ئەوا ئەمریکا خۆی لێ کەڕ و کوێر و لاڵ دەکات و ئەویش چۆنی بوێت، کورد جینۆساید بکات و خاک و ماڵی بەتاڵان ببات. جا ئەگەر عەلمانییەکی وەک ڕژێمە پێشووەكانی هەندێك لەووڵاتانی دەوروبەر بێت و ئەنفال و کیمیارانی کورد بکات، یان داعشێکی وەک جۆلانی بێت و سەروماڵت بەدەستکەوت بۆخۆی بزانێت.
٣- ئەو ووڵاتانەی کە زلهێزەکان دروستیان کردن و سنوریان بۆ کێشان و کوردیان بەسەردا دابەشکردن، جگە لەبابەتە نەتەوەییەکەی، بابەتی ئاینی بەهێزترین چەکی دەستیانە بۆ ئەوەی چۆنیان بوێت، جینۆسایدی کورد بکەن، بۆیە زۆر گرنگە، پیاوانی ئاینی و موسوڵمانانی کورد، زۆر لەوە هوشیارتر بن کە ڕێگە بدەن هیچکەس و لایەنێک موزایەدەی ئایین بەسەر گەلی کورد دا بکات و بەخێرایی و دەستبەجێ، هەر بە ئایەت و حەدیث وەڵامی توندیان بدەنەوە و ئەگەر ئایەتێک یان حەدیسێکیان دژی کورد بەکار هێناوە، بە دە ئایەت و حەدیس وەڵامیان بدرێتەوە و وەک ستەمکار وێنایان بکەن.
گرنگە کورد چاک لەوە تێبگات کە دونیا، دونیای ململانی و هێزە و بابەتەکانی برایەتی گەلان و برایەتی کورد لەگەڵ فڵان و فیسار یان هاوپەیمانی و پشتیوانیی فڵان لایەن و هێز، جگە خەیاڵ و خەونێکی بەتاڵ، هیچی دیکە نییە
لەگەڵ ئەوانەشدا، ئەی شتەكانی تر چین؟ کورد ئەبێت چی بکات؟
١- زۆر گرنگە کورد لەناوخۆدا یەکگرتوو و یەکدەنگ بێت، سەرکردەکانی كورد بیری خێڵەکی و عینادی سیاسی بخەنە لاوە و بەرژەوەندی نیشتیمانی بخەنە پێش بەرژەوەندی خێڵ و بنەماڵەکەیان و خەمی گشتییان، گەل و خاک بێت. چونکە بەڕاستی بەدرێژایی مێژوو، خۆخۆری و ململانێی نێو سەرکردەکانی کورد، گەورەترین زیانی بە دۆزی کورد گەیاندووە.
٢- گەلی کورد زۆر گرنگە بە ووریاییەوە مامەڵەبکات و هەرگیز بەدژایەتیكردنی ئایین یان هەر ئایدۆلۆژیا و نەتەوەیەكی دیكە، بەهانە نەداتە دەست هیچ داگیرکەر و خاوەن ئایدۆلۆژیا و بەرنامەیەک، یان دەستدرێژیکارێکی سەر کوردستان کە بیەوێت لەو ڕێگەیەوە زەفەر بە کورد و کوردستان ببات.
٣- زۆر گرنگە، کورد بنەمای گشتی هەبێت بۆ پەیوەندی لایەنەکان لەگەڵ وڵاتانی دەوروبەر، کە ڕێگە نەدرێت هیچ لایەنێک لەسەر حسابی لایەنەکەی دیکە، پەیوەندی لەگەڵ وڵاتان دروستبکات و ببێتە داردەستی ئەو ووڵاتانە بۆ سەرکوتکردنی ناوخۆ و سەپاندنی هەژمونی ئەو ووڵاتە لە نێو هەرێمی كوردستان. کۆتاییشدا ، بوونی هوشیاری بۆ کورد زۆر گرنگە، ئاخر ناکرێت لەهەموو پرسەکاندا، گەلی کورد دابەش ببێت بەسەر دوبەرەی تەواوی دژیەک و ڕێگەنەدرێت بەرەی ناوەڕاستی نێوبژیکار دروستببێت تا بتوانێت بە لۆژیکی عەقڵ و گفتوگۆ، جیاوازیەکان یەکبخات.
لەکۆتاییدا، هیوادارین کورد سود لەمێژوو وەربگرێت، زیاتر ڕووداوەکان و هۆکارەکانی پشت ڕووداوەکان بخوێنێتەوە، بەرژەوەندی بنەماڵە و خێڵ و حیزبی وەلابنێت و بەرژەوەندییە نیشتیمانی و نەتەوەییەكان بەئەولەویەت بزانێت و هەنگاوی ژیرانە و پێکەوەیی هەڵبگرێت.