کاتی خۆی سەتەلایتێکم ھەبوو جیاواز لەھەموو سەتەلایتەکانی ئەو کاتە . باسی ساڵی ٢٠٠٧ دەکەم . ئەم سەتەلایتە کاتێک سەیری بەرنامەیەکم بکردایە ئەگەر شتێک حاڵی نەبومایە دەمتوانی بیگێڕمەوە بۆ دواوە , ھەروەھا دەشمتوانی ئەو بەرنامە خەزن بکەم و پاشان ھەرکاتێک بمەوێ سەیری بکەم .
سەرەتا وامزانی ئەم سەتەلایتە شتێکی زۆرباشە , بەڵام پاش ماوەیەک بۆم دەرکەوت ئەمە زۆر خراپە !
بۆچی خراپ بوو ؟
دیقەتم دا ئەم مواسەفاتەی خەریکە #گێل و ئیھمالم دەکات , خەریکە تەرکیزم بۆ سەیرکردن و گوێگرتن وردە وردە دادەبەزێنێ !
ئەی بۆچی وای لێدەکردم ؟
کاتێک من بەھۆی مواسەفاتی سەتەلایتەکەوە دڵنیا بووم لەوەی دەرفەتی_دوەمم ھەیە بۆ گوێگرتن و سەرنجدان , ھەندێک جار خەمساردیم دەنواند و بەباشی موتابەعەی بەرنامەکەم نەدەکرد .
ئەم بابەتەم چۆن ھاتەوە یاد ؟
گروپی ڤایبەرەکانی #قوتابخانەکان ڕێک قوتابی وەک ئەو کاتەی من لێکردوە کە سەتەلایتەکەم ھەبوو !
🔹کاتێک قوتابی دڵنیایە لەوەی جەدۆلی ڕۆژانەو جەدۆلی تاقیکردنەوەکانی لە گروپەکە بۆ دادەنێن لە قوتابخانە ئیھمالی دەکات و ناینوسێ .
🔹کاتێک دڵنیایە لەوەی مامۆستا بابەتەکەی دیسان لە گروپەکە بۆ دادەنێ یان ڤیدیۆیەکی بۆ دادەنێ , بۆچی لە قوتابخانە گوێ بگرێت , ئەم گوێنەگرتنەشی دەبێتە ھۆی قورس کۆنترۆڵکردنی پۆل لەلایەن مامۆستاوە .
🔹کاتێک دڵنیایە لەوەی لە گروپ واجباتی ماڵەوەی پێ دەوترێت و دوایی سەیری مۆبایلەکەی دایکی بکات , چ پێویست دەکات لە قوتابخانە بزانێ ئەرکی ماڵەوەی چیە ؟
ئەم گروپانە کە وەک کەناڵێکی پەیوەندیی نێوان قوتابی و قوتابخانە دانراوە ئەوپەڕی #خەمساردی و بێ منەتی بەخشیوە بە قوتابی سەبارەت بەوەی لە قوتابخانە دەگوزەرێ , ئەسڵەن وەک مۆزەفێک دەچێت و دەیەوێ تەنھا غیاب نەدرێت .
🔹جاران لەسەردەمی ھەشتاکاندا , ئەو ڕۆژەی ھۆنراوەیەکمان دەخوێند مامۆستا دەیوت بزانم کێ ھەر یەکسەر دەتوانێ لەبەری بکات .
🔹کوا ئەوەندە پێویستمان بەوەبوو لەماڵەوە سەعی بکەین , دایک و باوکی چەندمان ئەسلەن خوێندەواربوون تا سەعیمان پێ بکەن ؟
قوتابخانە بەلایەنی کەمەوە بەشی نمرەی شەست و حەفتای تیا فێردەبوین .
بیرمە لەماڵی #خاڵم تەلەبە بووم ،خۆمان ماڵمان لەبازیان بوو , خاڵۆژنم بەدایکمی دەوت : بەخوا یەک سەعی ناکات ,دوایی گلەیی مەکە مەڵێ بۆ پێتان نەوتم , بەڵام بەخوا نمرەکانیشم سەروی ھەشتاو پێنج بوو , ھەمیشە ئەوایل بووم , زۆربەی کۆشش و سەعیشم گوێگرتنم بوو لە قوتابخانە .
پێشنار دەکەم , ھەرچی گروپی ڤایبەری قوتابخانەکانە دابخرێت , یەک پەیجی قوتابخانە وانەی دوبارە بۆ قوتابی دانەنێت , با قوتابیەکانمان لەوە زیاتر خەمساردو خاو نەبنەوە لە وەرگرتنی زانیاریدا..