لە دنیای پێشکەوتنی خێرای تەکنەلۆژیا لە ئێستادا، کە هەندێک جار بۆ خزمەتی مرۆڤایەتی و هەندێک جاریش بۆ زیانگەیاندن بە مرۆڤ بەکاردێت، ئێمەی کورد زۆرجار تەنها لە دوورەوە سەیری ئەو پێشکەوتنانە دەکەین و بە شێوەیەکی دروست سوودیان لێ وەرناگرین.
لە وڵاتە پێشکەوتووەکاندا خەڵک بە شێوەیەکی جدی کار دەکەن، هەشت سەعات کار، هەشت سەعات پشوودان و هەشت سەعاتی تریش بۆ ژیانی تایبەتیان تەرخان دەکەن. تەکنەلۆژیا بۆیان ئامرازێکە بۆ ئاسانکردنی ژیان، نەک بەفیڕۆدانی کات.
بەڵام لای ئێمە، زۆربەی خەڵک — چ کارکەر و چ بێکار — بەردەوام مۆبایلەکانیان لەدەستن و هەموو چرکەیەک سەیری سۆشیال میدیا و هەواڵی بێسوود دەکەن. ئەوەی مەبەستمانە، ئەو ڕیکلام و ناوەڕۆکە هەڵخەڵێنەرانەن کە بە شێوەیەکی بەردەوام بە گوێ و چاوی خەڵکدا دەکرێن.
ڕاستییەکەی ئەوەیە، زۆرێک لە ڕیکلامەکان لەسەر بنەمای هەڵخەڵەتاندن و گەمژەزانینی بەکارهێنەر دامەزراون. بەتایبەتی لە پرۆژەکانی نیشتەجێبووندا، لە ڕووی مەتر و مواسەفات و بەرواری تەواوبوونەوە، زۆرجار ڕاستی بە خەڵک ناوترێت. هەندێک کۆمپانیا ساڵانێکە بەڵێنی ناتەواو دەدەن، بەبێ ئەوەی هیچ لێپرسینەوەیەکی یاساییان لەگەڵ بکرێت.
ئەگەر پرۆژەیەک لە بەرواری دیاریکراو دواکەوت، دەبێت سزایەکی ماددی هەبێت. بۆ نمونە، ئەگەر کڕیار کرێچی بێت و تەواوبوونی شوقەکە ساڵێک دواکەوێت، کێ قەرەبووی کرێی ئەو ساڵە دەکاتەوە؟ ئەمە ناعادلانەیە و پێویستی بە یاسا و چاودێری هەیە.
هەروەها زۆرێک لە ڕیکلامەکان بە شێوەیەکی گاڵتەجاڕی پەخش دەکرێن. نموونەی ئەوەش ئەو ڕیکلامانەن کە دەڵێن “قسەکەمان بردەسەر” و بینەر وا تێدەگات کە پڕۆژەکە تەواو بووە، بەڵام دواتر دەزانیت تەنها ساڵێکی تر بۆ تەواوبوون پێویستە.
یان کاڵایەک بە ناوی “یابانی” یان “ئەوروپی” دەفرۆشرێت، بەڵام لە ڕاستیدا لە کارگەیەکی ناوخۆیی یان ژێرزەمینی دروست کراوە. ئەمانە هەموویان شێوەیەکن لە فریودان و سووکایەتی پێکردنی بیرکردنەوەی خەڵک.
لە وڵاتێک وەک ژاپۆن، ئەگەر وێنەی سەر پاکێتەکە لەگەڵ ناوەڕۆکی کاڵاکە زیاتر لە ١٪ جیاوازی هەبێت، ڕێگە پێنادرێت. ئێمە ناڵێین وەک ژاپۆن بین، بەڵام دەبێت هیچ نەبێت سنورێک بۆ ئەم هەڵخەڵەتاندنە دابنرێت.
بۆیە پێویستە یاسای پاراستنی بەکارهێنەر بە شێوەیەکی ڕاستەقینە جێبەجێ بکرێت و سنورێک بۆ ڕیکلامی بێمانا و هەڵخەڵێنەر دابنرێت. هەروەها دەتوانرێت لە ڕێگەی ئەپلیکەیشنێکەوە، پێش پەخشکردنی هەر ڕیکلامێک لە ڕادیۆ و تەلەفیزیۆن، لەلایەن لیژنەیەکی تایبەتەوە پشکنین بۆ بکرێت و کۆدێکی مۆڵەت بدرێت.
ئەمە کەمترین ڕێزگرتنە لە بینەر و بیسەر، و هەنگاوێکە بۆ دروستکردنی کۆمەڵگایەکی هۆشیارتر و دادپەروەرتر.