لەبری ئەوەی میدیا ئاوێنەیەک بێت بۆ پیشاندانی ڕاستییەکان و بەرزکردنەوەی ئاستی ھۆشیاری، بەشێکی زۆری میدیای کوردی و ئەوانەی بە "مایکبەدەست" ناسراون، بوونەتە ھۆکارێک بۆ تێکدانی شیرازەی خێزان و سوکایەتیکردن بە شکۆی ژنی کورد.
دەکەونە پرسیاری بازاڕی و نانەوەی دووبەرەکی
ئەم مایکبەدەستە نەزانانە پەنا دەبەنە بەر نزمترین ئاستی پرسیارکردن بۆ ئەوەی لە تۆڕە کۆمەڵایەتییەکاندا "لایک" و "کۆمێنت" کۆبکەنەوە.
پرسیارکردن لەوەی "پیاوی کورد ژنی عەرەب بێنێت یان کورد؟" تەنھا پرسیارێکی نەتەوەیی یان کۆمەڵایەتی نییە، بەڵکو:
♦سوکایەتییەکی ڕاستەوخۆیە بە ژنی کورد و کەمکردنەوەی ڕۆڵ و مێژووی ئەو لە کۆمەڵگەدا.
♦نانەوەی فیتنەیە لە نێوان نەتەوەکان و بریندارکردنی ھەستی ژنان.
♦بە کاڵاکردنی ژنە؛ وا پیشان دەدەن کە ژن تەنھا کەرەستەیەکە بۆ ھەڵبژاردن نەک مرۆڤێکی خاوەن بڕیارو کەسێتی تایبەتی خۆی
♦ بەزاندنی سنووری خێزان لە سەیرانگاکان
لە وەرزی گەشتوگوزاردا، ئەم مایکبەدەستانە بێ ھیچ ڕێزێک بۆ تایبەتمەندی خێزانەکان، دەچنە ناو وردەکاریی ژیانیان. پرسیارکردن لەوەی "پیاو چەند ژنی ھەبێت باشە؟" لە بەردەم ھاوسەرەکەی و منداڵەکانیدا:
♦تێکدانی دەروونی منداڵانە کە دەبینن باوکیان یان دایکیان دەخرێتە بەردەم پرسیاری وا شەرمەزارکەر.
♦ھاندانە بۆ فرەژنی و تێکدانی ئەو ئارامییەی کە خێزانەکە بۆی چوونەتە دەرەوە.
♦نەبوونی ئیتیکی ڕۆژنامەوانی؛ چونکە میدیای ڕاستەقینە ناچێتە ناو تایبەتترین کایەی مرۆڤەکان بۆ گاڵتەجاڕی.
♦ میدیا یان سێرک؟
ئەوەی ئێستا دەگوزەرێت میدیا نییە، بەڵکو جۆرێکە لە "سێرکی دیجیتاڵی". زۆربەی ئەوانەی مایک دەگرن بەدەستەوە
-ھیچ باکگراوندێکی ڕۆشنبیری و ئەکادیمییان نییە.
-تەنھا مەبەستیان داھاتی سۆشیاڵ میدیایە لەسەر حیسابی شکۆی خەڵک.
-ھەوڵی بەناوبانگبوون دەدەن بە ناشرینکردنی سیمای کۆمەڵگە.
♦پێویستە لایەنە پەیوەندیدارەکان، لە سەندیکای ڕۆژنامەنووسان و وەزارەتی ڕۆشنبیری، سنوورێک بۆ ئەم "مایکبەدەستە نەخوێندەوارانە" دابنێن.
پاراستنی شکۆی خێزان و ژنی کورد ئەرکێکی ئەخلاقییە و نابێت ڕێگە بدرێت بۆ چەند لایکێک، پیرۆزییەکانی خێزان بکرێنە قوربانی.
