نەوزاد بەندی 

لە سۆمەرست مۆمیان پرسی :

لەو ژیانە درێژەی کردووتە ، 

لە چی پەشیمانیت ؟ 

ووتی : به تەنیشت خۆشییەکاندا بە خێرایی تێدەپەڕیم و خۆم لێ گێل ئەکردن .. کەچی بە سەردا خۆم هەڵئەدایە ناو ناخۆشییەکان و زۆرترین کات تیایاندا ئەمامەوە و ئەتلامەوە .

*       *        * 

بە دیار ئەوانەوە تەمەنمان بەسەر ئەچێ کە نە ئەتوانین دڵیان خۆش بکەین و  نە ئەتوانن دڵمان خۆش بکەن ..!

*      *      *

ئەو هەموو مەزرای قۆخ و هەرمێیە، نابینین و  ..

بە دیار سێوێکی بن عەرزەوە ، 

چاوەڕوانیی ئەمانهاڕێ ..

٭        ٭        ٭ 

ئەو هەموو سوپەر مارکێتە ڕوناک و ڕەنگا و ڕەنگە ڕامانناکێشێ ، 

لە کوێرە فرۆشگایەکی گۆشەی کۆڵانێکا ، 

تەمەن و بۆنی کەڕوو بەیەکتر ئەناسێنین  ..

ئەڵێین : بەس نییە خوا ئەمەی داوە ؟ 

٭       ٭      ٭ 

سەر زەمینێکی فراوان ئەتۆرێنین و  ..

لە 150 مەترە دووجادا ، 

70 ساڵ تەمەن ئەتوێنینەوە ..

ئەڵێین بەرد له جێی خۆی سەنگینە  ! ..

(شانازیی بەوەوە ئەکەین کە بەردین  ) ..

٭       ٭       ٭ 

ئەو هەموو ڕەشەبا و هەورە ، 

لە دەرگا و پەنجەرەکانمان ئەدەن ، 

لەگەڵیاندا گەشت ناکەین بۆ وڵاتی باران ..

ناچینە دیدەنیی ئەستێرەکان ..

گەشت ناکەین بۆ پێدەشتی نێرگزەجاڕ ..،

کۆچ ناکەین بۆ ناو شەپۆلەکانی دەریا ..

وەک مێخێک ، لە پارچه زەوییەک چەقیوین ، 

کە بۆتە کەلاوەی خاشاک و جەنگی هەموو دنیا ..

کە مافیاکان نەوتەکەیان دزیوە ..

کە جەردەکان خاکەکەیان بەخشیوە ..

کە خۆ فرۆشەکان باسی سەروەرییەکانی خۆیانی تێدا ئەکەن ..