شیعری: بەرزان هەستیار
--
تکایە خۆڵ لێرەدا مەڕێژە،....
با ، بۆنت نەپرژێتە کۆڵان !
---
میزکردن لێرەدا .....
پیشەی ئەو مەستانەیە،...
کەس گوێ بۆ نەغمەی شمشاڵی...
ڕۆحی ڕەنگزەردیان شل ناکا
---
ئەم دوکانە گواستییەوە...
بۆ کۆڵانە تەنگەبەرەکەی نەداریی
---
تکایە قەرز نییە....
بۆ کڕینی نیو هەناسەی بەختەوەرییش
---
ڕاوەستان لێرەدا ...
بۆ عەرەبانەی خەیاڵە ئاڵوواڵاکان قەدەغەیە
---
تکایە وێر نییە،...
با ، هەر کەس بە برینی خۆی پارەی زەردەخەنەکانی بدا
---
ئەمە ئاوی خێرە ،...
خێری پاکبوونەوەی خەونەکانمان لە حەقیقەت !
---
ئەم خانووە بۆ فرۆشتن،...
بە بێ کۆڵەکەی ئازار و
بێ خەزێنەی یادەوەرییەکان
---
تکایە بێدەنگیی بپارێزە،...
گۆڕستان بۆ پشوودانە
---
بە چاوسەیر کە و
بە دڵ ڕەحم بە لەت.. لەتبوونی حەوسەڵەم بکە ، ئازیز
---
هاتنە ژوورەوە قەدەغەیە،....
نەک دەرگا، پەنجەرەکانی دڵیش ژەنگ خواردوونی.....
دەستیان بۆ مەبە، با وەک بەختەوەرییم هەڵنەوەرێن
---
ئەم کۆڵانە دەرناچێ ،....
لەو سەرەوە ، ژیان بە قوڕی نائومێدیی سواغی داوە
---
تکایە پاک و خاوێنی هۆڵەکە ڕابگرن،....
کراسی سپی ئەم کۆنسێرتی ئازارانە لە ئەرز ئەخشێ
---
تازە بۆیاخ کراوە،....
ئەم دیواری بیرەوەرییە خۆشانە ، بە زەهایمەر
---
تکایە ئەم شوێنە گیراوە...
بۆ شەڕی نێوان عیشق و تەنیایی
---
ئەم دەرگایە داخراوە،...
بۆت هەیە، لە کونی کلیلەکەوە ....
سەیری ئازارە قەدکراوەکانی سەر ڕەفە و
خەمە گرمۆڵەبووەکانی ژوور سەرم بکەیت
---
جگەرەکێشان قەدەغەیە،
دوکەڵی ئەو هەموو وێرانبوونەت ، لەم ناوە بە خەسار مەدە ،.....
با، تا ڕۆژی حەشر دەعواچیی نەبن لەسەرت
---
سێپتەمبەری 2017/ کۆلن