بڕیارە ئەمڕۆ سەرژمێریی ئەزموونی لە شارەكانی هەرێم و عێراق ئەنجامبدرێت و دوو مانگ دەخایەنێت.
بەپێی ئەو پلانەی لەلایەن وەزارەتی پلاندانانی عێراقەوە دانراوە، ئەمڕۆ سەرژمێریی ئەزموونی لە پارێزگا جیاجیاكانی عێراق، لە نێویشیاندا پارێزگاكانی هەرێمی كوردستان، دەستپێدەكات.
سەرژمێرییەكە ئەزموونییە و دواتر لەسەر ناوەرۆكەكەی پلانی ئەنجامدانی سەرژمێریی گشتی دادەنرێت كە بڕیارە لە كۆتاییەكانی تشرینی دووەمی داهاتوو لە سەرتاسەری عێراق بەڕێوەبچێت.
پێشتر محەمەد عەلی تەمیم وەزیری پلاندانانی عێراق رایگەیاند، سەرژمێریی ئەزموونی و راهێنانی کارمەندان لەسەر شێوازی ژماردنەکان ماوەی دوو مانگ بەردەوام دەبێت.
دواین سەرژمێری کە عێراق، بەبێ بوونی هەرێمی كوردستان، ئەنجامیداوە لە ساڵی 1997 بووە و ئەوكات ئاشكرایكرد ژمارەی دانیشتووان 22.33 ملیۆن كەسە. پێشتر هەر دە ساڵ جارێک سەرژمێرییەکی گشتیی دانیشتووان ئەنجامدەدرا.
بەپێی ئامارەکانی وەزارەتی پلاندانان، ژمارەی دانیشتووانی عێراق لە کۆتایی ساڵی 2022دا 42 ملیۆن و 248 هەزار و 883 کەس بووە.