شیعر: احمد مطر
وەرگێڕانی : پشکۆ ناکام
"''''''''''''''''''''''''
دزێک بە خشپەیی
خۆی کرد بە ماڵەکەما
سەعات و گوڵدان
و
ملوانکەکەمی دزی
کون و کەلێنێ گەڕام
بە دوای دزێکا
کەل و پەلەکانمی دزی
لە بازاڕ و بەندیخانەکانا
گەڕام بە دوایا
بەڵکو دەستم کەوێتەوە شتەکانم
بەڵام ھیچم بە ھیچ نەکرد
بڕیارم یا :
تا لای پۆلیس نەوەستم
چوومە لای فەرماندەی پۆلیس
بۆ گرتنی دزێک ماڵەکەمی دزی
کاتێ شەرحی حاڵم کرد
سەعاتێکم لەوەی خۆم
لە دەستیا بینی
ووتم : ببورە گەورەم
لەوانەیە دزی ماڵەکەم گیرا بێ
ئەو سەعاتەی وا لەدەستتا
لە باوک و باپیرم
ماوەتەوە بە میراتی
بە ڕقەوە سەیری کردم
ووتی :
بیبەن بۆ ژووری ئینفرادی
دوای ساڵێک ئازاد کرام
بڕیارم یا بچم بۆ لای قازی
بۆ شکات کردن لە :
فەرماندەی پۆلیس
و
دزێک ماڵەکەمی دزی
لە بەردەم گەورەی قازێکانا
بۆ گەڕان
بە دوای مافی خۆما ، وەستام
لەبەر دەمیا
گوڵدانەکەی خۆمم بینی
پێمووت : گەورەم
دیارە گیراوە
ئەوەی ماڵەکەمی دزی
ئەو گوڵدانە ھی منە
گوڵەکانمم تیا دائەنا
دوای ئەوەی قازی
ھاواری کرد : یاساوڵەکان
ئەم شێتە لابەن لەبەر دەمما
و
فێری بکەن ڕێزگرتن لە قازی یانی چی
ھەموو بێ دەنگ بوون ، بە خۆمەوە
دوای ساڵێک یان دووان
کەوتەوە بیرم
کە من لای جەنابی قازی بووم
بە پەلە و ھاوارەوە
چوومە لای جەنابی" والی"
ھەموو شتێکم بۆ باس کرد
بە دوور و درێژی
ووتم گەورەم :
ئەمە ئەوەیە کە ڕووی یا
دز و فەرماندەی پۆلیس و قازی
ھەموو بوون بە دوژمنم
بە زەردەخەنەوە سەیری کردم
ووتی : ئەترسم بڵێ ی
ملوانکەکەت ئەمەیە
کە وا لە ملی منا..!!
سەیرم کرد ملوانکەکەم
وا لە ملی جەنابی والی
ئەنجا " پەند"ەکە تێگەیشتم
خۆم و ھەر چییەکم ھەیە
موڵکی " والی " یە
دز قەت نەھاتبوە ماڵەکەم
بەڵکەمن خۆم
" دز"ەکەی ماڵەکەی خۆم بووم