زەردکی ٢، کۆمەڵە شیعرێکی نوێیە، ٩ ناونیشانی لە خۆ گرتووە، ھەمان ئەو ناونیشانەن کە لە زەردکی ١ ھەن. زەردکی ١ لە ساڵی ١٩٨٨ لە ژنێڤ/سویسرا چاپ و بڵاوکرایەوە.
قەسیدەی یەکەم لە ساڵی ٢٠١٣ نووسراوە و دوا قەسیدەشی لە ساڵی ٢٠٢٣ نووسراوە، واتە لە ماوەی دەساڵدا ئەم پڕۆژەیە کۆتایی پێھات.
سەرباری ئەوەی ئەم دوو ئەزموونە لەسەر ھەمان بنەما دامەزراون، کەچی دوو جیھانی شیعریی، دوو ئەزموون وەک دوو جیھانبینیی، تەنانەت بە دوو زمانی شیعریی جودا نووسراون.
رەنگە، وەک دوو ئاوێنە بن بەرامبەر بە یەک دانرابێتن، یەک ئەوی تریان دەخوێنێتەوە.
شایانی باسی قەسیدەی یەکەمی زەردکی ٢ دوای ٣٧ ساڵ نووسراوە.
لەو رووەوە، سەباح رەنجدەر دەڵێ :
زەوی بە یارمەتی شیعر فۆرمی وەرگرتووە
لە زەردک II لەگەڵ ئەحمەدی مەلا بەشداری ھەست و چاودێری جیھان دەکەین و ڕەسەنایەتی بۆ شوێن دەگەڕێنینەوە. دەقەکان خاڵی سەرەتای خۆیان دامەزراندووە و خوێنەر تا پلەی چێژ و یادگە بەرزدەکەنەوە ناو نیشانە ھاوچەرخەکانی ژیان و ئاراستەی دەکەن بۆ ناسینی وێناکردن و پەیوەندی و ھەڵگرتنەوەی پارچە کەوتووەکانی لەدەستچوو.
زەردک II ئامرازەکانی خۆی لە زەردک I وەرنەگرتووە، یان لەناوی نەماوەتەوە، بەڵکو بێلایەن و پەتییە، بەھۆی ئەوەوە دەوڵەمەندبووە. لە دەقی دووەمدا ژیان لە سەرەتاوە دەستپێدەکاتەوە و دەمانناسێت, واتە: بینایە، بینین نییە.
یەکەمجارە ڕێکەوت بکەم شاعیرێک کۆشیعرێکی بە دوو ئاستی شارەزایی ئەزموون بنووسێت. ئەم ئەزموون و داھێنان و دیاردەیە لە شیعری کوردیدا بەر ئەحمەدی مەلا دەکەوێت. پێی دەڵێین بیرکردنەوە و چاوی زیندووی شیعر.
سی و پێنج ساڵ نێوانیان بێدەنگییەک، یان بەردەوامبوونەوەیەکی ئێستێتیکی و سەرچاوەی نوختەی بینینە، بینینی بەدیھێنانی لەدایکبوونەوە.
لەدایکبوونی مرۆڤ تا خوداوەند. لەدایکبوونەکان دووبارەبوونەوەنین، تەکنیکی نووسینن.
ئەم کۆمەڵە شیعرە دەزگای سەردەم ھەڵدەستێ بە چاپکردنی، بە سەرپرشتی ئازاد بەرزنجی.
