ئەم بەرهەمە نوێیە، لە دووتوێی (202) لاپەڕە دایە. شایانی باسە، تا ئێستە بە گشتی، (52) بەرهەمی لە بوارە جیاجیاکانی (زمانەوانی، وێژەیی، ڕۆژنامەوانی، یاد و بیرەوەری، ساتیر، مێژوو، جوگرافیا و جیۆپۆلێتیک، کۆمەڵایەتی، ڕامیاری و نەتەوەیی)دا بڵاوکردووەتەوە، بە هەمووشی (096. 12) لاپەڕەی نووسیوە.

لە پێشەکی بەرهەمەکەدا نووسیوێتی: (ماوەی پتر لە (50) ساڵە دەنووسم، هەرگیز بە دڵی هیچ کەس و لایەنێکی ڕامیاری کوردی و کوردستانی نەمنووسیوە، بەڵکوو هەرچیم بە ڕاست و درووست زانیبێ، چ لە وتار و چ لە پەرتووکەکانمدا، لە دید و باوەڕی نەتەوەیی و نیشتمانی خۆمەوە، لەبەر ڕۆشنایی بەرژەوەندی باڵای نەتەوەکەم نووسیومە و تا ماویشم، لە ئەو ڕێبازە لانادەم و هەر بە ئەو شێوەش دەنووسم، گەر تووشی چەرمەسەریەکی زۆریش بم! هەر وەک هۆنەری گەورەی کوردیش (مەحوی) فەرموویەتێ:

بەحەق هەر حەق، بەناهەق ناهەقم وتووە لە ڕۆژێ بووم

وەکوو (مەنصور)، ئەگەر بشمکۆژن، ناکەم لە حەق لادەم.

ئاخر ڕۆژێ لە ڕۆژان،  گوێم لە سرتە و بۆڵەی هیچ کەس و لایەنێ نەگرتووە، چونکە ئەو نووسەرانەی، بە دڵی خەڵک و دەسەڵاتداران دەنووسن، نووسەر نین، بەڵکوو ماستاوچین و ڕاستییەکان، لە کۆمەڵانی خەڵک دەشارنەوە، خۆشیان و جەماوەری گەل چەواشەدەکەن.)

ناوەڕۆکی پەرتووکەکە، لە ئەم بابەتانەی خوارەوە پێکهاتووە:

(پێشەکی. عە‌رەب و ئيسلام. په‌تای بیانیپه‌رستی و دێوجامه‌ی ئایین. وەڵامێ بۆ دەقپەرست و بیانیپەرستان. هێلکە و سۆسجی تورکی. کورد و وتاری ئایینی. هەرچی سمێڵی سووربوو، هەمزائاغا نییە. ئۆردووگان گەمەیەکی ترسناک بە ئاوەزی کورد دەکا. نانی کونەماسی دەخوا و پاسی چڕتاوا دەکا. کوردێکی موسوڵمان و موسوڵمانێکی کورد. تا ماڵ وەستابێ، مزگەوت حەرامە. ئەز دەقپەرست نیم. ئیسلامیزم و جیهانگیری. ئیسلامیزم و کۆمۆنیزم. ئیسلامیزم و دێمۆکراسی چەواشەکارانە. ئیسلامیزم و تیرۆر. ئیسلامیزم و ئاشتی و جەنگ. ئیسلامیزم و دەسەڵات. مێژوو خۆی دووبارەدەکاتەوە. ئیسلامیزم و چەواشەکردن. ئیسلامیزم و ڕێبازی سەلەفی. ئیسلام و ئازادی 9 بەش. ێشەوایانی ئیسلام و بێویژدانی. کورد و ئایینی هاوبەش 3 بەش. ئەنفال و دەسەڵاتی دەوڵەت 2 بەش. ئاییندەی ئایینەکان و کۆمەڵی مرۆڤ 2 بەش. کاری ڕامیاریی و ئایین. یەکگرتووی ئیسلامیی و کێشەی کورد، پێوەندی نێوان توورکیا و ئیسرایل.)

بەرهەمەکە لە ئەم شوێنانە دەسدەکەوێ:

پەرتووکخانەکان: جەمال عیرفان، غەزەلنووس، شێخ رەزای تاڵەبانی، ئاوات، وشە.

تێبینی: ئەم بەرهەمە، بە قازانج و مایەوە، بۆ نەخۆشخانەی (هیوا)یە.