قوباد تاڵەبانی، جێگری سەرۆك وەزیرانی هەرێم رایگەیاند، ئەمڕۆ ئۆجەلان جارێكی دیكە دەرگای بەڕوی چارەسەری ئاشتیانەی پرسی كورد لە توركیا كردەوە. دەشڵێت، ئەركی هەمو لایەكمان پێشوازی لە پەیامەكەی ئۆجەلان بكەین.
ئاوێنە: قوباد تاڵەبانی لە پەیامێكدا وتویەتی"کورد هەمیشە گەلێکی ئاشتیخواز بوە و بزوتنەوە کوردییەکان وەک دوا رێگەچارەو بە ناچاری، بۆ پاراستنی مان و داکۆکی لە مافە بنەڕەتییەکان پەنایان بردوەتەبەر بە چەک."
جێگری سەرۆك وەزیران ئاماژەی بەوەشداوە"ئەمڕۆ بەڕێز عەبدوڵا ئۆجەلان جارێکی دیکە دەرگای بەڕوی ئاشتی و چارەسەری ئاشتییانە و دیموکراسییەکانی پرسی کورد لە تورکیادا کردەوە و هاوکات دەستپێکی قۆناغێکی نوێی تێکۆشانی سیاسی بۆ کورد لە تورکیا راگەیاند."
قوباد تاڵەبانی وتوشیەتی"هیوادارین و گەشبینین ئەمجارەیان پرۆسەکە بە ئەنجامێکی دڵخواز بۆ هەردو گەلی کورد و تورک کۆتایی بێت و پێکەوە بناغەی پێکەوەژیانێکی راستەقینە بونیادبنێن."
جەختیشی كردۆتەوە "ئەرکی هەمو لایەکمانە پێشوازی لە پەیامەکەی بەڕێز ئۆجەلان بکەین و لە هەر چەشنە هاوکاری و پشتیوانییەک بۆ سەرخستنی پرۆسەکە درێخی نەکەین."