هەرەوەز گۆڤارێکی پەروەردەیی و ئەدەبی منداڵانە، قوتابخانەی هەرەوەزی بنەڕەتی، بەپێی وەرزەکانی خوێندن بڵاوی دەکاتەوە، ئەم گۆڤارە خاوەنی ئیمتیازەکەی بەڕێوەبەرێتی قوتابخانەی هەرەوەز و سەرنوسەری گۆڤارەکەش، نوسەرو ڕۆژنامەنوس (ڕەووف محەمەد ئالانی)ە. گۆڤارەکە بە قەبارەی مامناوەندو لەدوتوێی( ٥٢)لاپەڕەی ڕەنگاوڕەنگ خۆی دەنوێنێ، بابەتەکان وێنەی تایبەتیان بۆ دانراوە و سەرنجی خوێنەران بەگشتی و منداڵان بەتایبەتی بۆ لای خۆی کێش دەکەن، لەم ژمارەیەدا چەندین جۆر لە نوسین لەبواری پەروەردەو ئەدەبی منداڵان خراونەتەڕوو، لە بابەتی چیرۆک، شیعر، کورتەباس، مەتەڵ، بەرهەمی منداڵان و زۆری تر.
ئەم جۆرە گۆڤارو بڵاوکراوانە، ئەگەر هاوکاریان بکرێت، دەبنە هاندەر و ڕێنیشاندەر بۆ منداڵان و پەرە بە خولیا و بەهرەکانیان دەدرێت، ئەم بەهرانەش لەداهاتوودا لەناو منداڵاندا چرۆ دەکەن و ئایندەیان گەش دەبێت و بەرهەمی دەبێت. دواڕۆژی منداڵان باشتر دەنەخشێنن و بەجوانی ئاراستە دەکرێن.