شەوی ڕابردوو بە فەرمان و سەرپەرەشتی دۆناڵد ترەمپ فڕۆكە جەنگییەكانی ئەمریكا بەرەو یەمەن بەڕێكەوتن، لەوێ چەند هێرشێكی ئاسمانیان بۆ سەر حووسیـیەكان دەستپێكرد، لە ئەنجامدا دەیان كەس كوژران و برینداربوون و لەوبارەوە ترەمپ ڕایگەیاند، دەرگای دۆزەخمان بەڕووی حووسییەكانی یەمەن كردەوە.
ئاوێنە: میدیا عەرەبییەكان سەبارەت بە هێرشەكانی شەوی ڕابردووی ئەمریكا بۆ سەر حووسییەكانی یەمەن و ژمارەی قوربانییەكان، زانیاری نوێ دەخەنەڕوو.
میدیاكان بڵاویان كردەوە، شەوی ڕابردوو فڕۆكە جەنگییەكانی ئەمریكا بەڕێكەوتن بەرەو یەمەن، لەوێ چەند هێرشێكی ئاسمانیان بۆ سەر حووسیەكان دەستپێكرد و چەند ناوەند و شوێنكی حووسییەكانیان لە سەنعا و حودیدە و چەند ناوچەیەكی دیكەی ئەو وڵاتە كردە ئامانج.
ئاماژە بەوەشكراوە، هێرشەكان بە فەرمان و سەرپەرشتی دۆناڵد ترەمپ سەرۆكی ئەمریكا بووە، هەروەها ترەمپ وتی: دەرگای دۆزەخمان بەڕووی حووسییەكانی یەمەن كردوەتەوە.
میدیاكانی سەر بە حووسییەكانی یەمەن بڵاویان كردووەتەوە، بەهۆی هێرشەكانی ئەمریكاوە ٣١ كەس كوژران و ١٠١ كەسی دیكەش بریندار بوون.
ئەم هێرشانەی ئەمریكا لە كاتێكدایە، پێشتر یەحیا سەریع وتەبێژی گرووپی حووسیەكانی یەمەن ڕایگەیاند بوو، هێرشەكانیان بۆ سەر كەشتییە بازرگانییەكان لە دەریای سوور و كەنداوی عەدەن دەستپێدەكەن.