عەمار حەكیم، سەرۆكی رەوتی حیكمەی نیشتمانی پیرۆزبایی لە خەڵكی هەڵەبجە دەكات و دەڵێت، بە پارێزگاكردنی هەڵەبجە، باشترین رێزلێنانە بۆی.
ئاوێنە: عەمار حەكیم، ئەمشەو دوشەممە، لە پەیامێكدا وتی"كردنی هەڵەبجەی شەهید بە پارێزگایەكی نوێی عێراق، باشترین رێزلێنانە بۆی، بەجۆرێك كە دەرفەتی كار و توانای ئابوری و نوێنەرایەتیی سیاسی فراوانتری لە بڕیاری عێراقیدا بۆ دەڕەخسێنێت."
سەرۆكی رەوتی حیكمە ئاماژەی بەوەشداوە "لەكاتێكدا كە ئەو هەنگاوەی پەرلەمانی عێراق بەرز دەنرخێنین، داوای دادپەروەری بۆ سەرجەم پارێزگاكان و پێدانی دەسەڵاتی فراوانتر بە ئیدارەكانیان دەكەین، بەشێوەیەك كە ببێتە مایەی كەمكردنەوەی باری سەر شانی حكومەتی فیدراڵ."
لە كۆتاییشدا وتویەتی"پیرۆزە لە هەڵەبجەی خۆڕاگر و خەڵكە خۆشەویستەكەی."