دوا کۆمەڵە شیعری ئەحمەدی مەلا لە ژێر ناونیشانی "ستایشی ئاو" بڵاوبووەوە. ستایشی ئاو هەم شیعرییەتی ئاوە، جولە و سەرهەڵدان و کیمای ئاوە، هەم چوونە قووڵاییەکانی تراژیدیای پەیوەندی ئاو و مرۆڤە.
پەیکەرێکی شلە لە هەموو سووچێکەوە دەڕژێتە بوونەوە، باسی ئاو و پێکهاتەکانی ئاو لە خۆ دەگرێت، جۆرەکانی ئاو وەک خەونی مرۆڤ شێوەی جیاواز دەگرێتە خۆی.
ئەم دەقە شیعرییە بە کەشتی کۆتایی دێت و دوو پەڕەگرافی شیعریی دەبن بە دەروازە بۆ ئەوەی شەش بەش لە خۆ بگرێ کە ئەمانەی لای خوارەوەن :
ئاوە نوستووەکان
ئاوە سازگارەکان
سوێراوەکان
ئاوی ژێرزەوی
ئاوە تیژڕەوەکان
ئاوە پیسەکان
هەوڵێکی دیکەیە بۆ نوێکردنەوەی شێوە و ناوەڕۆک، خەمێکی گەردوونییە بە دوای ژینگەیەکی رەها بۆ هەناسەدانی مرۆڤ.
نموونەیەک :
بە نیاگارادا شۆڕ دەبووەوە،
کەفچڕینی سەوزباو،
هاڵاوێکی غەمگینی لێ بەرزدەبووەوە،
دەتگوت دوا خۆرنشینە تەڕ دەبێ.
وەک ماڵاوایی،
بە نیگارادا شۆڕدەبووەوە،
گیاوگۆڵە منجڕەکانی رادەپێچی،
رێگر نەمابوو بۆ ئاوابوون.