دەستەی گشتیی کەشناسی و بوومەلەرزەزانیی عێراق، نوێترین زانیارییەکانی سەبارەت بە گۆڕانکارییەکانی کەشوهەوای ناوچەکە بڵاوکردەوە و هۆشدارییەکی توند دەداتە هاووڵاتییان لە نزیکبوونەوەی شەپۆلێکی چڕی خۆڵبارین.
ئاوێنە: بەپێی ڕاگەیەندراوەکەی دەستەکە، لە ڕۆژی هەینییەوە گۆڕانکارییەکی بەرچاو لە کەشوهەوادا ڕوودەدات و شەپۆلێکی چڕ و کاریگەری خۆڵبارین ڕوو لە زۆربەی ناوچەکانی وڵات دەکات، کە ئەمەش کاریگەرییەکی نەرێنی و ڕاستەوخۆی لەسەر مەودای بینین دەبێت.
لە بەشێکی دیکەی زانیارییەکاندا ئاماژە بەوە کراوە، لە کاتەکانی شەوی هەینیدا کاریگەرییەکانی ئەم شەپۆلە فراوانتر دەبێت و بەرەو ناوچەکانی دیکەی وڵات کشانی زیاتر بەخۆیەوە دەبینێت. هەروەها پێشبینی دەکرێت کاریگەرییەکانی ئەم خۆڵبارینە تا ڕۆژی شەممە لە هەردوو ناوچەی ناوەڕاست و باشووری عێراق بەردەوامیی هەبێت.
هاوکات، دەستەی کەشناسی جەختی لەوە کردووەتەوە کە بەهۆی چڕیی ئەم شەپۆلەوە، مەودای بینین بەشێوەیەکی مەترسیدار دادەبەزێت و دەگاتە کەمتر لە یەک کیلۆمەتر، ئەمەش پێویستی بە وریایی زیاتری هاووڵاتییان هەیە لە کاتی دەرچوون و هاتووچۆدا.