فەرماندەی گشتیی هێزەکانی سوریای دیموکرات رایگەیاند، پێشوازی لە بڕیاری لادانی سوریا لە لیستی وڵاتانی پاڵپشتیکار لە تیرۆر دەکات و دەڵێت ئەم هەنگاوە بۆ پتەوکردنی پەیوەندییە نێودەوڵەتییەکان "گرنگە".
ئاوێنە: ئەمڕۆ سێشەممە مەزڵووم عەبدی، فەرماندەی گشتیی هێزەکانی سوریای دیموکرات (هەسەدە)، لە راگەیەنەراوێکدا دەڵێت "پێشوازی لە بڕیاری لادانی سوریا لە لیستی ئەو وڵاتانە دەکەین کە پاڵپشتی لە تیرۆر دەکەن".
ئەو فەرماندەیە وتیشی "ئەم بڕیارە هەنگاوێکی گرنگە لەپێناو راستکردنەوە و پتەوکردنی پەیوەندییە نێودەوڵەتییەکان، هەروەها رێگە لەبەردەم قۆناخێکی نوێی سەقامگیری، گەشەپێدان و کارکردن بۆ داهاتووی وڵاتەکەمان دەکات".
بەوتەی عەبدی، ئەو بڕیارە دەستکەوتێکە بۆ بەدیهێنانی خواستەکانی گەلەکەیان لە ئاسایش، ئاشتی و گەشەسەندندا.
ئەوەش لەکاتێکدایە، رۆژی دووشەممە 24ی ئابی 2026، وەزارەتی دەرەوە و گەنجینەی ئەمریکا، بڕیاریان دا بە لادانی ناوی سوریا وەک "دەوڵەتی پشتیوانی تیرۆر" و دەرهێنانی "دەستەی تەحریری شام - HTS" لە لیستی رێکخراوە تیرۆریستییە جیهانییەکان و لیستی سزاکان.