ئاسایشی رۆژهەڵاتی هەولێر رایگەیاند، لەمڕۆوە پڕۆسەی تۆماکردنی ئۆتۆمبێلە بێ سەرەتاکان لە سنوری کۆیە و دەوروبەر دەستپێدەکات.
ئاوێنە: بەڕێوەبەرایەتیی ئاسایشی رۆژهەڵاتی هەولێر لەمیانی راگەیەندراوێکدا، ئاشکرایکرد "ئەمڕۆ یەكشەممە 17ی ئایاری 2026 پڕۆسەی تۆماركردنی ئۆتۆمبێلە بێسەرەتاكان لەسنووری كۆیەو دەوروبەری دەستپێدەكات و بنكەی سەرەكیی پڕۆسەكەش سایلۆی كۆیە، سەرووی هەزەی كۆیە دەبێت".
لە راگەیەندراوەکەدا چەند خاڵێک خراوەتەروو؛ کە پێویستە خاوەن ئۆتۆمبێلەكان ئەم بەڵگەنامانەیان پێبێت:
ـ كۆدی ئاسایشی كەسی ئەسڵی
ـ كارتی نیشتمانی
ـ كارتی زانیاری
ـ مۆڵەتی شۆفێری
ـ وێنەی هەر چوارلای
ـ ئۆتۆمبێلەكە و ژمارەی شاسی (شانسی) و سەرجەمیان لەسەر پەڕیەكی (A4) چاپكرابن.
ئاماژە بەوەشکراوە، ئەم ڕێكارە تەنها ئەو ئۆتۆمبێلانە دەگرێتەوە كە پێشتر تۆمارنەكراون و گواستنەوەی خاوەندارێتیش بۆ ئەو ئۆتۆمبێلانەی پێشتر تۆماركراون ئەنجام نادرێت.