پەرلەمانتارێکی عێراق ئاماژە بەوە دەکات کە سەرۆکی پەرلەمانی عێراق پێشنیاری کردووە داهاتی گومرگەکان بچێتە سەر هەژماری هەرێمی کوردستان کە ئەوەش چارەسەرە بۆ کێشەی 'ئەسیکۆدا'.
ئاوێنە: د. ڕێبوار کەریم، ئەندامی پەرلەمانی عێراق لەسەر فراکسیۆنی ڕەوتی هەڵوێست لەبارەی کۆبوونەوەی لیژنەی دارایی لە ئەنجومەنی نوێنەرانی بەغدا لەسەر پرسی سیستەمی گومرگیی (ئەسیکۆدا)، بە میدیای پارتی وت "تەنیا یەک ناکۆکی لەسەر پرسی ئەسیکۆدا مابووەوە؛ عێراق داوای دەکرد داهاتی خاڵە گومرگییەکانی هەرێمی کوردستان بچێتە سەر هەژمارێکی فیدراڵی لە وەزارەتی دارایی عێراق و دواتر نیوەی بگەڕێنرێتەوە، لەبەرامبەردا هەرێمی کوردستان داوای دەکرد دوو هەژماری بانکی بۆ هەردوولا بکرێنەوە و داهاتەکە بە یەکسانی بچێتە سەر هەردووکیان".
بەگوێرەی ئەو میدیایە، لە کۆبوونەوەکەی ئەمڕۆی لیژنەی دارایی کە تێیدا هەیبەت حەلبووسی، سەرۆکی پەرلەمانی عێراقیش ئامادە بوو، کۆدەنگییەک بۆ چارەسەرکردنی کێشەکە دروست بووە. بەپێی پێشنیارەکەی سەرۆکی پەرلەمان کە "مەبدەئییەن" پەسەند کراوە، بڕیارە داهاتی گومرگەکان بچێتە سەر هەژمارێکی تایبەت لە وەزارەتی دارایی هەرێمی کوردستان، بەڵام لەژێر چاودێریی هەریەکە لە وەزارەتی دارایی عێراق و دیوانی چاودێریی دارایی فیدراڵیدا بێت.