وتەبێژی فراکسیۆنی پارتی لە پەرلەمانی عێراق رایگەیاند، وەزارەتی دارایی عێراق پارهی پێویستی بۆ موچەی مانگی حەوتی فەرمانبەرانی هەرێمی کوردستان دابینکردوە و لە رۆژانی داهاتودا بڕیار لەسەر ناردنی دەدرێت.
ئاوێنه: دانەر عەبدولغەفار، وتەبێژی فراکسیۆنی پارتی و ئەندامی لیژنەی دارایی لە پەرلەمانی عێراق، ئهمڕۆ یهكشهممه، به میدیای حزبهكهی وت، دوای پەیوەندیکردنیان بە فەرمانگەکانی ژمێریاری، بودجە و نوسینگەی فەرمیی وەزیری دارایی عێراق، دڵنیایان کردونەتەوە کە پارەی پێویست بۆ موچەی مانگی حەوتی فەرمانبەرانی هەرێمی کوردستان ئامادەکراوە و تێکڕای رێکارە ئیداری و یاساییەکان کۆتایییان هاتوە و تەنیا بڕیاری کۆتایی بۆ خەرجکردنی پارەکە ماوەتەوە.
سەبارەت بە چۆنیەتی ناردن و دابەشکردنی بودجەکە، دانەر عەبدولغەفار وتی "خەرجکردنی موچەی مانگی حەوت بە هەمان شێوازی مانگەکانی پێشو دەبێت، واتە بڕی 120 ملیار دیناری لێ دەبڕدرێت و باقیی پارەکە رەوانەی هەرێمی کوردستان دەکرێت."
وتەبێژی فراکسیۆنی پارتی ئاماژەی بەوە كرد، چاوەڕێ دەکرێت لە رۆژانی دوشەممە یان سێشەممەی داهاتودا، بڕیاری فەرمی و کۆتایی لەسەر ناردنی موچەی فەرمانبەرانی هەرێمی کوردستان لە لایەن بەغداوە بدرێت.